Tre persona kanë mbetur të vdekur, ndërsa një tjetër është plagosur rëndë gjatë një atentati mafioz në Memaliaj të Tepelenës.
Ngjarja ndodhi afër mesnatës së mbrëmshme dhe ka tronditur qytetin e vogël të jugut.
Mësohet se të vrarë janë Shyqo Kalemi, 74 vjeç, Marsel Çela 47 vjeç, dhe Gledio Muka 36 vjeç.
I plagosur ëdhtë Artur Kalemi 57 vjeç, i cili ndodhet në gjendje të rëndë në spital.
“Rreth orës 23:20, në lagjen nr. 3, Memaliaj, në lokalin e shtetasit K. K., në rrethana ende të paqarta janë vrarë me armë zjarri shtetasit Shyqyri Kalemi, 74 vjeç, Marsel Çela 47 vjeç, dhe Gledio Muka 36 vjeç.
Ndërsa është plagosur Artur Kalemi 57 vjeç i cili është transportuar për në spital, për të marrë ndihmë mjekësore”, njoftoi policia e Tepelenës.
Shërbimet e Policisë, me marrjen e njoftimit, shkuan menjëherë në vendin e ngjarjes dhe kanë ngritur pika kontrolli në bashkëpunim me Drejtorinë Vendore të Policisë Fier, Berat, Vlorë.
Në drejtim të Memaliajt janë nisur Forcat Speciale Renea, Forcat Kombëtare të Sigurisë si dhe drejtues të lartë të Drejtorisë së Përgjithshme të Policisë së Shtetit.
“Autorët menjëherë pas ngjarjes janë larguar me shpejtësi në drejtim të Mallakastrës me një automjet të cilin dyshohet se e kanë djegur në fshatin Bejar të Mallakastrës.
Forcat Kombëtare të Sigurisë dhe Renea kanë shkuar në vendin ku digjej automjeti, kanë rrethuar zonën dhe vijojnë kontrollin për kapjen e autorëve”, njoftoi policia.
Çfarë dyshohet për shkaqet e atentatit me tre viktima?
Besohet se Shyqyri Kalemi ka qenë objektiv i atentatit.
Shyqyriu është babai i Zamir dhe Andrea Kalemit (ky i fundit i njihur edhe si Tik Kalemi), të dy me precedentë penalë dhe që i kanë shpëtuar disa tentativave për ekzekutimin e tyre, brenda e jashtë vendit.
Andrea hetohej si i përfshirë në vrasjen e biznesmenit Edmond Papa, ngjarje kjo e ndodhur në dhjetor të vitit 2022.
Dy vëllezërit Kalemi, janë të afërm të Aleksandër Sadikajt, i cili mbeti i vdekur në një atentat mafioz, me eksploziv në makinë në afërsi të TEG më 11 qershor 2022.
Disa muaj më vonë, në 16 dhjetor 2022 në Tiranë u ekzekutua biznesmeni nga Fieri me banim në Sarandë, Edmond Papa për të cilën dyshohet se u krye si hakmarrje për ekzekutimin e 27-vjeçarit Aleksandër Sadikaj.
Andrea Kalemi, vëllai i Zamir Kalemit është përmendur në dosjen hetimore të vrasjes së Edmond Papës si person i cili ishte interesuar për eleminimin e biznesmenit nga Saranda.
