Kryetarja e re e Këshillit Kombëtar të Partisë Demokratike, Julia Emiri, ka njoftuar zhvillimin e mbledhjes së parë të forumit që drejton, ku pritet të zgjidhet ekipi i ri drejtues i partisë.
Përmes një mesazhi drejtuar anëtarëve të Këshillit Kombëtar, Emiri bëri me dije se mbledhja do të zhvillohet të mërkurën, më 15 korrik, në orën 18:00.
Sipas rendit të ditës, Këshilli Kombëtar do të votojë për zgjedhjen e ekipit që do të ndihmojë kryetarin e Partisë Demokratike në drejtimin e saj. Konkretisht, pritet të zgjidhen Sekretari i Përgjithshëm, nënkryetarët e PD-së, anëtarët e Sekretariatit, si dhe Komisioni i Apelimit të Partisë Demokratike.
Njoftimi:
Të nderuar zonja dhe zotërinj anëtarë dhe anëtare të Këshillit Kombëtar!
Së pari, ju falenderoj dhe njëherë bashkarisht për mbështetjen dhe ju shpreh mirënjohjen, respektin dhe përkushtimin tim absolut për punën tonë të përbashkët, që uroj të na shkojë sa më mbarë.
Së dyti, ju njoftoj që ditën e mërkurë, më datë 15 Korrik, ora 18:00, do të zhvillohet mbledhja e Këshillit Kombëtar të Partisë Demokratike, me rend dite:
1-Zgjedhja e ekipit që do të ndihmojë Kryetarin në drejtimin e Partisë; konkretisht:
a-)Sekretarit të Përgjithshëm;
b-)Nënkryetarëve të PD-së;
c-)Sekretariatit të PD-së;
d-)Komisionit të Apelimit të PD-së.
2-Të tjera.
