Jemi kërrusur o shokë, u plakëm dalëngadalë
Duke ngritir transhe e bunker në fushë e në mal
Vitet na i thelluan rrudhat nëpër ballë
Si të çara shkëmbi në diell e acar !
Dielli fytyrat na i përzhiti
Na i rrudhosi e na i bëri si eshkë
Si arën fytyrën shiu na e vaditi
Siç laget shkëmbi në bjeshkë !
Shputat e këmbëve me kallo na janë bërë
Duke rendur transheve një jetë të tërë
Pozicioni yt këtu, këtu e ke ti tjetri
Vraponte i riu vraponte dhe i vjetri !
Vrapuam dhe kohën kurrë se kapëm
Duke vrapuar u rritëm, duke vrapuar u plakëm
Të mbeshtjell në kapotë , mbuluar me pelerinë
Duruam acaret, duruam dhe suferinë !
Çdo gjë kemi duruar, të fortë në këmbë
Shpesh të pa fjetur, shpesh të pa ngrënë
Në marshime e poligone shpeshherë u gdhimë
Të lagur nga vesa që binte në luginë !
Ishim të rinj e kurrë s’u ndjemë
Se dhe kohët tona të tilla qenë
Sot na mpihet një krah, na mpihet një këmbë
Çdo pjesë e trupit më shumë na dhemb !
USA, Floridë, korrik 10 – 2024.
