Nga Enver Robelli
“Der Spiegel”: Biden duhet t’ia bëjë një të mirë botës dhe të tërhiqet
Rreth dy të tretat e amerikanëve mendojnë se Joe Biden, me 81-vitet e tij, është shumë i moshuar për një mandat të dytë. Demokratët kishin kërkuar një duel të hershëm televiziv kundër Donald Trumpit për të shmangur këtë shqetësim. Tani miliona votues panë presidentin e tyre, dhe shqetësimet e tyre u konfirmuan.
Ata panë një Joe Biden, që ishte i vështirë për t’u kuptuar, që zinte në thua në fjalët e tij, që humbiste fillin, që shikonte në kamerë i zbehtë dhe me një fytyrë të ngrirë, dhe që nuk mundi ta mbaronte pa gabime as deklaratën e tij në fund. Me një fjalë: ishte një katastrofë, aksidenti më i madh i mundshëm.
Paraqitja e Bidenit ishte aq e keqe, saqë edhe miqtë e tij më besnikë nuk dinin si ta mbronin atë. Si mund të mbrohet një kandidat që doli në skenë me hapa të ngurtë dhe më pas nuk ishte në gjendje të kundërshtonte gënjeshtrat e zakonshme të ish-presidentit – dhe kjo ndodhi ndonëse ai kishte kaluar ditë të tëra me dhjetëra këshilltarë duke u përgatitur për duelin me sfiduesin e tij?
“Frankfurter Allgemeine Zeitung”: Trump braktisi studion si fitues
Biden dështoi në mënyrë spektakulare në detyrën e tij.
Prej javësh, demokratët janë ankuar për videot e montuara keqdashëse nga pala tjetër, që synojnë të diskreditojnë komandantin suprem si një plak senil. Debati televiziv nuk ishte manipuluar, por edhe aty Biden dukej herë pas here si një plak i lodhur. Trump e braktisi studion si fitues, sepse arriti t’i paraqes fuqishëm fjalitë e tij të mbushura me shtrembërime të fakteve, gënjeshtra dhe akuza të pahijshme, zakonisht duke pritur deri sa i vinte radha.
“Süddeutsche Zeitung”: Një përpjekje e pashpresë
Pyetja nuk është se kush e humbi këtë duel televiziv. Pyetja është më së shumti, kur e humbi Joe Biden këtë duel. A ndodhi kjo pas rreth 15 minutave, kur ai humbi mendimet e tij diku midis copëzave të fjalive të tij mbi çështjen e migracionit? A bëri vaki kjo pas rreth 13 minutave, kur ai për një çast, që dukej se zgjaste sa një përjetësi, po kërkonte një fjalë nga fusha e politikës së shëndetësisë? Apo ndoshta ndodhi pas pesë sekondave, kur ai gogësiti përgjigjen e tij të parë të kësaj mbrëmjeje për të sulmuar kundërshtarin e tij Donald Trump dhe këtë e bëri me një zë të dobët dhe çjerrës? Në gjendjen në të cilën Biden u paraqit, kjo ishte një përpjekje e pashpresë që nga fillimi i dështuar deri në fundin e hidhur.
