Kroacia dhe Shqipëria u ndanë në barazim 2-2 në ndeshjen e dytë të grupit B në Euro2024, një rezultat që nuk favorizon asnjë nga kombëtaret, që kanë mbledhur secila nga 1 pikë pas dy ndeshjesh të luajtura.
Kroatët arritën të përmbysin disavantazhin e një goli brenda 3 minutash kur realizuan dy gola të shpejtë në minutat 74 dhe 77 të ndeshjes, por gjithçka ndryshoi në minutën e 94 kur Gjasula realizoi golin e barazimit.
Sigurisht që kroatët kishin ambicie për fitore dhe nuk e prisnin që do të dilnin vetëm me 1 pikë nga përballja me Shqipërinë.
Ishte minuta e fundit e shtesës dhe lojtarët kroatë dhe pankina e tyre priste fërshëllimën e fundit për të festuar, por ajo fërshëllimë ishte për golin e Gjasulës.
Shqiptarët e lanë fushën e lojës me një gëzim të dukshëm, ndërsa kroatët të zhytur në zhgënjim
Duket se nga kroatët ai që e ka përjetuar ndoshta më keq këtë rezultat ishte Luka Modriç.
Pas fishkëllimës së fundit 38-vjeçari u ul në fushë, duke mbështetur duart mbi gjunjë dhe ishte tepër i mërzitur.
Në këtë moment kapitenit kroat i është afruar Kristjan Asllani, i cili ka kërkuar ndërrimin e fanellës.
Një veprim i zakonshëm xhentëllmenësh është ky gjest, por duket se ky nuk ka qenë një çast i mirë për kapitenin veteran të Kroacisë.
Modriç ende s’po e kalonte dot traumën për humbjen e dy pikëve në sekondat e fundit dhe i bëri sbenjë Asllanit se do të ndërronte fanellat në dhomën e zhveshjes.
Asllani u tregua i sjellshëm dhe i zgjati dorën Modriçit duke e ndihmuar të ngrihej në këmbë.
