Një shpërthim ka ndodhur në Durrës, në lagjen 14.
36-vjeçarit Artan Alla në orët e para të mëngjesit të kësaj të mërkure i shpërthyen me lëndë plasëse fasadën e dyqanit të mobilerisë “Luart Mobileri” në Rrashbull të Durrësit.
Në një prononcim për mediat, ai përgënjeshtron Policinë, ku sipas autoriteteve, lënda plasëse iu vendos për motive pronësie. Alla shprehet se nuk ka konflikt me askënd dhe se pronën e ka me dokumente të rregullta.
Ndër të tjera, 36-vjeçari tregon se autori ishte i maskuar me kapuç, teksa sipas tij, kjo është hera e tretë që i vendosin tritol.
Artan Alla: Unë kam dyqanin këtu. S’kam konflikti me asnjë njeri në botë, as për prona s’kam konflikt, as borxh si kam kujt, e kam me leje ndërtimi, me licencë. Rri këtu te dera e dyqanit me serbes, nuk kam konflikt me asnjeri.
Gazetarja: Policia tha se ju keni deklaruar se keni një konflikt pronësie për një copë toke me një person tjetër?
Artan Alla: Ja kanë fut kot. Mbase kanë dyshimet e veta. Kamerat kanë kapur një person duke kaluar këtu, duke e hedh lëndën dhe duke ikur. Ka qenë me kapuç me maskë. Kjo është hera e tretë që ma hedhin, e kanë hedhur njëherë në nëntor, njëherë para 3-4 javësh dhe sot prapë.
Njoftimi i Policisë së Durrësit
“Në orët e para të mëngjesit, në Rrashbull, Durrës, në ambientet e jashtme të mobilierisë në pronësi të shtetasit L. A., 36 vjeç, është hedhur një sasi lënde e dyshuar plasëse. Si pasojë janë shkaktuar vetëm dëme materiale.
Nga veprimet e para hetimore dyshohet se lënda plasëse është hedhur për shkak të një konflikti për motive pronësie. Në Drejtorinë Vendore të Policisë Durrës janë shoqëruar 3 shtetas që dyshohet se kanë dijeni për rastin. Grupi hetimor, në drejtimin e Prokurorisë, vijon hetimet për zbardhjen e rastit, identifikimin e kapjen e autorit/ve”, njofton policia.
