Italia do të tërhiqet nga nisma kryesore e Kinës, “Një Brez një Rrugë“ (Belt and Road, BRI), ka konfirmuar qeveria.
Administrata e kryeministres Giorgia Meloni njoftoi Pekinin se do t’i jap fund pjesëmarrjes në iniciativë përpara një afati përfundimtar në fund të vitit.
Italia ishte i vetmi shtet i madh perëndimor që u bë pjesë e iniciativës në vitin 2019, vendim i cili u kritikuar asokohe nga Shtetet e Bashkuara dhe vendet e tjera.
E nisur nga presidenti kinez Xi Jinping në vitin 2013, BRI synon të investojë rreth 1 trilion dollarë në të gjithë Azinë dhe Europën. Projektet duke përfshirë hekurudhat dhe portet e reja dhe të përmirësuara synojnë të lidhin Kinën me Europën dhe pjesë të tjera të Azisë.
“Një Brez një Rrugë“ është kritikuar që në fillim nga SHBA si një shembull i “diplomacisë që fut shtetet në kurth përmes borxhit”.
Uashingtoni thotë se planet e Kinës përfshijnë projekte të paqëndrueshme të mëdha që vendet nuk janë në gjendje të financojnë, duke i dhënë Pekinit mundësi për qëllimet e veta.
Italia ishte më e madhja nga 18 anëtarët e BE-së, veçanërisht në lindje dhe jug të kontinentit, pjesë e iniciativës.
Anëtarësimi i vendit në BRI do të rinovohej automatikisht në mars të vitit të ardhshëm nëse Italia nuk do të njoftonte Kinën se po tërhiqej deri në fund të këtij viti.
Zonja Meloni e kishte quajtur më parë vendimin e qeverisë së mëparshme për t’u bashkuar “një gabim serioz” dhe tregoi se ishte e vendosur të tërhiqej.
Por qeveria e saj theksoi se po kërkonte të ruante marrëdhënie të mira me Kinën, pavarësisht lëvizjes.
Vetëm një pjesë e vogël e investimit me vlerë deri në 20 miliardë euro në Itali të premtuar nga Xi në 2019 është realizuar.
Eksportet italiane në Kinë ishin me vlerë 16.4 miliardë euro vitin e kaluar, krahasuar me 13 miliardë euro në vitin 2019. Nga ana tjetër eksportet kineze në Itali u rritën në 57.5 miliardë euro nga 31.7 miliardë euro gjatë së njëjtës periudhë.
Kina tregton shumë më tepër me anëtarët e BE-së, Francën dhe Gjermaninë, pavarësisht se dy ekonomitë më të mëdha të eurozonës nuk janë anëtare të BRI.
Që nga ardhja në detyrë vitin e kaluar, zonja Meloni është përpjekur të udhëheqë një politikë të jashtme më pro-perëndimore dhe pro NATO-s sesa paraardhësit e saj.
Lëvizja e zonjës Meloni vjen përpara një samiti midis Presidentes së Komisionit Europian Ursula von der Leyen dhe zotit Xi të enjten. Gjatë takimit, zonja von der Leyen pritet të paralajmërojë presidentin kinez që të frenojë furnizimin me mallra të lira, duke përfshirë panele diellore dhe makina elektrike në BE./ BBC
