Probleme serioze për Meta, shoqëria që kontrollon Facebook dhe Instagram.
33 prokurorë të përgjithshëm nga po aq shtete të SHBA (duke përfshirë Kaliforninë dhe Nju Jorkun) kanë depozituar një padi për kompaninë teknologjike që drejtohet nga Mark Zuckerberg.
Akuza lidhet me efektet e rrjeteve sociale dhe internetit tek më të rinjtë. Në veçanti, shtetet pretendojnë se kompania i ka projektuar qëllimisht platformat e saj për t’i bërë të rinjtë të varur nga mediat sociale, duke shfrytëzuar dobësitë e tyre psikologjike dhe sociale.
Në fakt, platformat e saj shkaktojnë ankth, depresion dhe në disa raste më ekstreme, edhe vetëvrasje. Jo vetëm, mendohet se Meta ka përdorur të dhënat personale të përdoruesve për të rritur fitimet.
Akuza lidhet veçanërisht me platformën Instagram, e cilësuar më e dëmshmja për shëndetin mendor të fëmijëve. Sipas shteteve, ka rrethana rënduese që gjiganti i teknologjisë me seli në Menlo Park ka fshehur provat e efekteve të tij negative tek të rinjtë.
“Meta – lexohet në dokument – ka shfrytëzuar vuajtjet e adoleshentëve duke i krijuar qëllimisht platformat e saj me mekanizma që përfshijnë varësinë nga Facebook dhe Instagram, duke minuar vetëvlerësimin e tyre” – deklaroi Letitia James, prokurore e përgjithshme e Nju Jorkut, një nga shtetet e përfshirë në padinë federale.
“Kompanitë e mediave sociale, duke përfshirë atë të Mark Zuckerberg, kanë kontribuar në një krizë kombëtare të shëndetit mendor te të rinjtë dhe duhet të mbajnë përgjegjësi”.
Nëse procesi do ta shpallë fajtor, kolosi teknologjik i themeluar nga Mark Zuckerberg do të jetë i detyruar të paguajë kompensim të konsiderueshëm, si dhe të bëjë ndryshime në platformat e cituara në gjykatë. Duke marrë në konsideratë që përdoruesit e saj në vend janë qindra milionë dhe se shkelja sjell gjoba prej mijëra dollarësh, shifra mund të jetë vërtet e madhe.
Meta u mbrojt nga akuzat duke thënë se kujdeset për sigurinë dhe mirëqenien e adoleshentëve online dhe se ka prezantuar më shumë se 30 funksione për të mbrojtur përdoruesit e rinj dhe familjet e tyre, duke përfshirë edhe mundësinë e funksioneve të mbikëqyrjes në Messenger dhe Instagram.
“Jemi të zhgënjyer nga fakti që në vend të punojnë në mënyrë produktive me kompanitë e të gjithë sektorit për të krijuar standarde të qarta dhe të përshtatshme për moshën, për shumë aplikacione të përdorura nga adoleshentët, prokurorët e përgjithshëm kanë zgjedhur këtë rrugë” – tha një zëdhënës.
Padia e ngritur të martën është vetëm e fundit në një listë të gjatë që e sheh kompaninë e mediave sociale në bankën e të akuzuarve për problemet që lindin te fëmijët dhe adoleshentët.
/ Il Sole 24 Ore
