Një ngjarje e rëndë ka ndodhur në Greqi, ku një shqiptar ka ndërruar jetë gjatë një aksidenti të rëndë në vendin e punës.
Sipas mediave greke, 54-vjeçari, baba i dy fëmijëve ka qenë duke punuar në një rrugë në Kormi, duke shtruar fibra optike. Gjatë punës, makineria që shërben për çarjen e betonit, nga pakujdesia i ka kaluar sipër, duke i prerë kokën.
Vendi i ngjarjes është rrethuar nga Policia greke që në momentin e parë, ndërsa në vendngjarje kanë mbërritur ambulanca dhe një zjarrfikëse.
Për shkak të aksidentit janë arrestuar dy drejtuesit e makinerive dhe aktualisht ndodhen në Stacionin e Policisë së zonës për të dhënë deklaratën e parë për ngjarjen tragjike.
