Pse shkaktohen komplikacionet e diabetit?
Komplikacionet, përbëjnë sëmundjen e vërtetë të diabetit. Hiperglicemia(sheqeri i lartë) e zgjatur në kohë është shkaktare e të gjitha dëmtimeve. Sa më e lartë të jetë dhe sa më gjatë në kohë, aq më i madh është rreziku. Fillimisht komplikacionet mund të jenë të heshtura, por mbas disa vitesh ato shfaqen hapur duke dominuar sëmundjen. Komplikacionet mund të prekin organe dhe sisteme të ndryshme. Në mënyrë klasike dëmtojnë enët e mëdha të gjakut duke shkaktuar sëmundje që dëmtojnë zemrën, trurin dhe anësitë e poshtme, si dhe sëmundje që dëmtojnë enët e vogla të gjakut, duke demtuar sytë dhe veshkat. Është gjithashtu neuropatia diabetike, që dëmton nervat.
Sa të shpeshta janë komplikacionet kronike nga diabeti?
Komplikacionet varen nga zgjatja e diabetit (përfshi dhe periudhën që ju nuk e keni ditur që jeni me diabet) si dhe shumë faktorë të tjerë, përfshi kontrollin e nivelit të sheqerit, tensionin e lartë të gjakut dhe duhanpirjen. Në mënyrë të veçantë tensioni i lartë i pakontrolluar, rrit në mënyrë të dukshme komplikacionet e diabetit.
