Për fermerët/ Shërbimet e ullirit në muajin shtator.

Kokrrat nisin të grumbullojnë vaj dhe të rritin madhësinë e tyre, nevojat e bimës për ujë edhe gjatë kësaj kohe janë të larta.
Në rast se nuk bien shirat e para të vjeshtës, vazhdon ujitja. Ajo është mjaft e dobishme për rritjen e peshës se fryteve dhe shtimin e prodhimit.
Përfundon tëharja e gjelbër. Nis punimi i gjithë sipërfaqes së tokës, i cili përveç dobive të tjera ndikon shumë në depërtimin dhe depozitimin e ujit të reshjeve nën tokë.
Krahas punimit mbillen bimë për plehrim të gjelbër si: batha, bizelja, foragjere, buxhaku, lupini, etj dhe në mungesë të tyre mbillen farëra të gramoreve që japin masë të madhe të gjelbër si : thekra, tërshëra, loliumi apo bime të tilla si kolza, perko, sinapi, etj, mjafton që të japin sasi të mëdha lënde organike për përmbysje. Sistemohen dhe përgatiten vendet që do të mbillen me ullinj të rinj.
Kryhen trajtimet kimike kundër mizës së ullirit, sidomos në ullinjtë kokërmëdhenj për kripje si dhe trajtimet kundër syrit të palloit, në vatrat që preken nga kjo sëmundje.
Sipas Prof.dr.Resmi Osmani