Platforma e rrjetit social në pronësi kineze, TikTok, njoftoi një sërë funksionesh të reja për përdoruesit europian, që synojnë të përmirësojnë pajtueshmërinë me rregulloret që do të hyjnë në fuqi të Bashkimit Europian.
Në bazë të Digital Services Act (Akti për Shërbimet Dixhitale – DSA) të BE, ByteDance, e cila ka në pronësi TikTok, Google, njësi e Alphabet, dhe platforma të tjera të mëdha online do të detyrohen të kontrollojnë përmbajtjen e paligjshme në platformat e tyre, të ndalojnë disa praktika reklamimi dhe të ndajnë të dhëna me autoritetet.
Por pasi muajin e kaluar, TikTok pranoi t’i nënshtrohej vullnetarisht një “stres testi”, komisioneri i tregut të brendshëm të BE, Thierry Breton, deklaroi se duhet të bëhet “më shumë punë” që kompania të jetë plotësisht në përputhje me këto rregulla.
“TikTok po i kushton burime të rëndësishme konformitetit – deklaroi Breton për CNN. – Tani është momenti për të shpejtuar hapin, për të qenë plotësisht në përputhje me rregulloren”.
Të premtem e kaluar, kompania zbuloi masat e reja për të qenë në përputhje me DSA – ta bëjë më të thjeshtë për përdoruesit europianë të raportojnë përmbajtje të paligjshme, t’i lejojë ata të çaktivizojnë rekomandimet e personalizuara për videot dhe të elimonojnë reklamat e shënjestruara për përdoruesit e moshës 13 – 17 vjeç.
“Ne do të përpiqemi të përmbushim jo vetëm detyrimet tona rregullatore, por edhe të vendosim standarde të reja nëpërmjet zgjidhjeve inovative” – deklaroi kompania.
/ Reuters
