Kryeministri i Kosovës, Albin Kurti ka përkujtuar disa masakra të ushtrisë serbe mbi familjet shqiptare të Kosovës.
Me një status në rrjetet sociale, Kurti teksa shpreh dhimbjen dhe respektin për viktimat, thekson se: “Këto masakra, vrasje e zhdukje me forcë, sikurse edhe të gjitha masakrat tjera në Kosovë, janë dëshmi e pamohueshme e krimeve të luftës, krimeve kundër njerëzimit dhe gjenocidit të shtetit të Serbisë ndaj shqiptarëve gjatë luftës 1998-1999 në Kosovë”
Postimi i plotë:
Çdo 31 maj përkujtojmë martirët e Paklekut të ri të Drenasit dhe Studimes së Vushtrrisë.
25 vjet më parë, forcat e armatosura të Serbisë, vranë dhe zhdukën me forcë dhjetë civilë shqiptarë në Paklek të ri. Për fatin dhe vendodhjen e nëntë prej tyre nuk dihet ende.
Një vit me vonë, më 31 maj 1999, në Studime, forcat serbe masakruan 13 anëtarë të familjes Gërxhaliu. Në mesin e tyre, shtatë ishin fëmijë.
Këto masakra, vrasje e zhdukje me forcë, sikurse edhe të gjitha masakrat tjera në Kosovë, janë dëshmi e pamohueshme e krimeve të luftës, krimeve kundër njerëzimit dhe gjenocidit të shtetit të Serbisë ndaj shqiptarëve gjatë luftës 1998-1999 në Kosovë.
Trupi i Kosovës i gjithi është i mbushur me plagë, të cilat për t´u shëruar kanë nevojë për drejtësi. Drejtësia është i vetmi ilaç. Është themeli i qëndrueshëm për paqe.
U prehshin në paqe martirët dhe dëshmorët e Paklekut të Ri dhe Studimes!
Lavdi!
