Memorandum Bashkëpunimi
Midis Kandidatëve për Kryetarë të Bashkive Tiranë, Durrës, Elbasan,
Vorë, Krujë, Kavajë, Peqin dhe Rrogozhinë
Ne, Kandidatët për Kryetarë të Bashkive Tiranë, Durrës, Elbasan, Vorë, Krujë, Kavajë, Peqin dhe Rrogozhinë, duke marrë parasysh se:
– Kosto e jetesës në Shqipëri është rritur ndjeshëm dhe në mënyrë të papërballueshm për qytetarët;
– Ndihma që qeveria qendrore ka ofruar për përballimin e rritjes së kostos së jetesës është e papërfillshme/joekzistente, si për qytetarët ashtu edhe për bizneset;
– Se Shqipëria është sot vendi me rrogën mesatare më të ulët në rajon, kur në vitin 2013 ishte vendi me rrogën mesatare më të lartë në rajon;
– Se 25% e forcës së punës në Shqipëri paguhet me pagë minimale;
– Se 60% e të ardhurave mujore të familjeve shqiptare shkojnë vetëm për të siguruar ushqim dhe veshmbathje;
– Se varfëria absolute është rritur shumë, e bashkë më të edhe shtresa e popullsisë që kërcënohet të bjerë në varfëri; (sipas Eurostat, 74.7% e popullatës në moshë pune kërcënohet nga varfëria dhe sipas Bankës Boterore Shqipëria ka nivelin më të lartë të varfërisë në Rajon);
Duke qënë të ndërgjegjshëm se Qeverisja Vendore ka mundësi të përdorë instrumenta të cilët ndikojnë drejtpërdrejt në zbutjen e varfërisë dhe në rritjen e mirëqenies familjare;
Duke e konsideruar punësimin dhe mirëqenien ekonomike të familjeve tona si prioritet absolut, të shprehur edhe në programet tona zgjedhore të Qeverisjes Vendore;
Duke patur parasysh faktin se ka mijëra punonjës – familjarë, të cilët për arsye pune zhvendosen çdo ditë duke përdorur linjat urbane ndërqytetase dhe se kosto e përditshme e transportit është një vlerë e konsiderueshme në raport me pagën e tyre;
Angazhohemi
– Të gjithe banorët dhe rezidentët e Bashkive tona, të cilët për arsye të punësimit të tyre përdorin linjat urbane ndërqytetase, do të pajisen me abonim vjetor me kosto 100 lekë në vit;
– Kjo masë do të hyjë në fuqi menjëherë pas datës 14 maj!
