Mësohet se një punonjës i Policisë Rrugore të Tiranës është arrestuar nga kolegët pasi u kap me lëndë narkotike në automjetin e tij.
Bëhet me dije se arrestimi i tij është bërë në Dhjetor, por nuk ka pasur njoftim zyrtar nga Policia e Shtetit.
Efektivi i rrugores, Renato Feri u pikas nga forcat Shqiponja duke ecur me shpejtësi tej normave të lejuara në afërsi të Pallatit me Shigjeta.
Mbasi është konstatuar lëvizja me shpejtësi, forcat Shqiponja i bënë me shenjë të ndalonte, duke vënë re se mjeti ishte me xhama të errët.
Polici Feri i ka shpërfillur dhe ka shtuar shpejtësinë duke rrezikuar jetën e njërit prej policëve që i kërkuan të ndalonte.
Më pas ka ndaluar, ka hapur xhamin dhe ka nisur t’i shajë dhe ofendojë kolegët.
Përsëri është larguar dhe nuk u identifikua.
Forcat Shqiponja lajmëruan sallën operative ku u bë i mundur ndalimi i tij në afërsi të rreth rrotullimit të TEG-ut.
Pas kapjes, policia zbuloi se Renato Feri ishte koleg i tyre, efektiv i Rrugores.
Gjatë kontrollit në makinën e tij u gjet kanabis sativa.
Ata e arrestuan në flagrancë kolegun dhe dërguan në Komisariatin nr. 6. Renato Feri është djali i Arian Ferit, i cili është shef sektori i burimeve njerëzore në Drejtorinë e Përgjithshme të Policisë së Shtetit.
Burimet bëjnë me dije se efektivi Renato Feri është përjashtuar nga Policia e Shtetit me urdhër të kryepolicit Muhamet Rrumbullaku. Mbi të rëndojnë akuzat e kundërshtimit të punonjësve të policisë dhe prodhimi e shitja e lëndëve narkotike.
