Sot në mëngjes janë arrestuar 25 persona për planifikimin e grushtit të shtetit në Gjermani, të cilët dyshohet se kanë punuar në kuadër të Lëvizjes Qytetare të Rajhut, e cilësuar si organizatë terroriste. Drejtuesi i saj, sipas policisë gjermane, është Princi Heinrich XIII Reuss, i cili me ndihmën e një ish-deputeti formoi këtë lëvizje me qëllim përmbysjen e qeverisë aktuale në Gjermani dhe rivendosjen e Rajhut dhe monarkisë.
Një operacion i madh policor është kryer mëngjesin e sotëm, ku janë kryer mbi 130 kontrolle në të gjithë vendin.
Të dyshuarit e arrestuar janë pjesë e një grupi terrorist, qëllimi i të cilit ishte përmbysja e rendit ekzistues shtetëror në Gjermani. Ata u arrestuan në shtetet e Baden-Vyrtemberg, Bavari, Berlin, Hesse, Saksonia e Ulët, Saksonia, Turingia, si dhe në Austri dhe Itali.
Ata akuzohen se kanë përgatitur veprime të bazuara në ideologjinë e diskutueshme deri në fund të nëntorit 2021. Të gjithë janë anëtarë të Lëvizjes Qytetare të Rajhut, e cila synon të shfuqizojë Gjermaninë moderne. Kjo organizatë, të cilën policia e cilëson si terroriste, kishte Këshillin e saj, anëtarët e të cilit mblidheshin rregullisht për të përgatitur grushtin e shtetit.
Ata thuhet se kanë përgatitur tashmë udhëheqjen e tyre për t’u instaluar pas grushtit të shtetit. Mes të arrestuarve janë edhe ish-pjesëtarë të ushtrisë, si dhe shtetasja ruse Vitalija B.
Çfarë është një organizatë e kontestuar
Ka disa grupe dhe individë të krahut të djathtë ekstrem në Gjermani që hedhin poshtë legjitimitetin e shtetit modern gjerman në favor të Rajhut, i cili ekzistonte nga 1871 deri në 1918.
Ata pretendojnë se Rajhu Gjerman vazhdon të ekzistojë brenda kufijve të tij të para Luftës së Dytë Botërore dhe qeveriset nga një “Qeveri e Përkohshme e Rajhut”.
Shumica e argumenteve të tyre bazohen në një lexim selektiv të vendimit të vitit 1973 të Gjykatës Kushtetuese Federale në lidhje me Traktatin Themelor të vitit 1972 ndërmjet Gjermanisë Perëndimore dhe Lindore.
Princi Heinrich XIII Reuss dhe ish-deputetja e Bundestagut Birgit Malzach-Winkemann u identifikuan si udhëheqës.
Kush është Princi Heinrich?
Princi Heinrich XIII Reuss është 71 vjeç dhe punon si konsulent privat. Ai është anëtar i shtëpisë mbretërore Royce që sundoi në shekullin e 12-të.
Në të kaluarën, Princi Heinrich tërhoqi vëmendjen me deklaratat antisemite në “Lëvizjen Qytetare të Rajhut”. Në fjalimet e tij, ai pohoi se Gjermania nuk është një shtet sovran dhe se elita hebreje nxit luftëra sepse kjo u sjell dobi.
Gjatë verës, ai ishte i pranishëm në incidentin në Bad Lobenstein, kur kryetari i bashkisë atje sulmoi një gazetar. Zëdhënësi i Shtëpisë së Rojsit, pjesë e së cilës është Princi Heinrich, u distancua nga princi në atë kohë, duke e quajtur atë një “plak të hutuar”.
Sipas policisë gjermane, organizata tani planifikoi ta bënte princin udhëheqësin e ri të Gjermanisë. Si ndihmë ai punësoi rusen Vitalya B., e cila gjithashtu u arrestua.
Detyra e saj gjoja ishte t’i siguronte atij kontakte me autoritetet ruse, në mënyrë që t’u kërkonte atyre mbështetje për rrëzimin e qeverisë aktuale në Gjermani dhe vendosjen e një monarkie.
