Ministrja e Turizmit, Mirela Kumbaro u shpreh se vendimi për vendosjen e pagesës për të hyrë në parkun kombëtar të Divjakës është aplikuar në bazë të Vendimit të Këshillit të Ministrave.
Ajo nxori nga xhepi dhe tregoi një monedhë 50 lekësh në foltoren e Kuvendit, ku është thirrur në një interpelancë urgjente nga deputetët e opozitës.
Veprimi i saj me monedhën ishte në funksion të ilustrimit dhe për të treguar çmimin simbolik për hyrjen në zonat e mbrojtura.
Kumbaro deklaroi se fondet e mbledhura nga vizitorët përdoren projekte të ndryshme në këtë park.
Nga fjala e saj në parlament:
Jam në një interpelancë urgjente, arsyeja është kjo. Kjo 50 lekëshe, për të hyrë në çdo park kombëtar, mund të bësh shëtitje në natyrë, për të parë pelikanin, flamingot. Ky çmim ulet edhe më shumë nëse është një grup me 10 veta, dhe nëse kemi 20 veta bëhet 2.5 lekë, dhe nëse kemi një grup të madh, çmimi është edhe më i vogël. Nëse dikush mendon se këto çmime i shpik unë, gabohet. Është vendimi i Këshillit të Ministrave që i ka vendosur. Kjo është VKM e dhjetor 2020. Ju keni bërë dhe një kërkesë padi dhe gjykata ua ka rrëzuar. Do ishte mirë që ta tërhiqni atë kërkesë padi. Ky ligj ka dalë në vitin 2017 për zonat e mbrojtura, neni kur flet për financimin thotë që financohet nga buxheti i shtetit dhe të ardhrua të tjera. Neni 58 i po këtij ligji thotë të ardhurat e siguruara në zonate mbrojtura, janë të ardhura për vizitorët që vizitojnë zonën, donacione të ndryshme e të tjera.
Për të gjithë ata që nuk e dinë se përse na duhen këto të ardhura, përdoren për investime në zonat e mbrojtura, përballimin e shpenzimeve për punësime sezonale, projekte pyllëzimi, luftë kundër gryerjes dhe erozionit e të tjera, parandalimi i zjarreve, transporti, tha ministrja.
