Vizita e presidentit të Republikës Federale Gjermane, z.Frank-Walter Steinmeier, ishte e dyta në historinë e vizitave të kryetarëve të shtetit gjerman në Shqipëri. Ajo u artikulua në media me formulimin më të çuditshëm me fjalinë “e para në 27 vjet”, a thua se viti 1995 përbënte ndonjë epokë pikëfillimi numërimi të veçantë në marrëdhëniet dypalëshe. Çdo vizitë llogaritet nga viti që dy vende vendosin marrëdhënie diplomatike, që në rastin konkret është viti 1987. Vizita e fundit është e dyta e një kryetari shteti nga Gjermania. Vizitën e parë në Shqipëri e ka bërë presidenti Roman Herzog (1934-2017), i cili ishte president në vitet 1994-1999. Ai vizitoi Shqipërinë në shkurt-mars 1995. Më 28.2.1995 mbajti edhe një fjalim në Kuvendin Popullor. Si ish anëtar i Gjykatës Kushtetuese të RFGJ-së, ai theksoi rëndësinë e saj në jetën e një vendi. Herzog në fund të fjalës së tij tha: “Vendi juaj ka akoma përpara detyra të mëdha për të shkundur nga supet barrën gati 50-vjeçare, të izolimit dhe diktaturës”. Besoj se kjo shkundje nuk mund të quhet e përfunduar.
