Kështu shkruan në një status në rrjetet sociale Bukurosh Ajdini, i cili është një nga kandidatët e PD-së për bashkinë Memaliaj.
Ajdini është një emër i njohur si aktivist demokrat dhe me përvojë në pushtetin lokal.
Sigurisht që ai ka sfidën e primareve brenda subjektit politik me tjetër koleg dhe kandidatë demokrat, para se të shpallet zyrtarisht kandidat për zgjedhjet vendore të 14 majit.
Ja postimi i plotë i tij:
Të nderuar demokratë, simpatizantë dhe votues të partisë demokratike, sot kryesia e partisë demokratike miratoi kandidaturën time për të marrë pjesë në garën për primaret brenda subjektit tonë politik, për të qenë kandidat i partisë demokratike për Bashkinë Memaliaj !
Ky kandidim nuk vjen as i rastësishëm dhe as i beftë, por vjen si një vazhdimësi e një rruge të gjate si anëtar i partisë demokratike, por edhe si një person që kurrë nuk i kam shkëputur lidhjet me vendlindjen.
Krahinën tonë e ndërtojnë bijtë që e duan…
Largësia ime me Memaliaj dhe zonën tonë në kilometra përherë është zeruar nga shpirti dhe mendimi që ka mbetur në krahinën ku lindëm e u formuam.
Një shtysë e madhe është edhe im atë, sot 85 vjeç, i cili ka punuar 30 vjet në minierën e Memaliajt, dhe se pavarësisht moshës gezohet si fëmijë kur merr lajme të mira nga zona, por ka dhe një brengë të madhe se pse ato fshatra braktisen, por edhe për ata që banojnë aty dhe vuajnë për kushtet më minimale të jetesës.
Personalisht vij nga një eksperiencë 8 vjeçare në pushtetin lokal duke akumuluar një përvojë të madhe përsa i takon pushtetit lokal.
Njoh gjithë problematikat që ka territori i Bashkisë Memaliaj, ku vlen për t’u theksuar që gangrena më e madhe është mungesa e infrastrukturës rrugore, papunësia dhe mungesa e perspektivës.
Një tjetër dhimbje është largimi i të rinjve Tepelenas nga atdheu.
Mirëkuptoj ambicien e kujtdo që kërkon një mundësi më shumë dhe kudo që ikën, por të ikësh sepse atdheu nuk të siguron kushtet minimale, kjo është psherëtima jonë e madhe.
Në këto kushte dhe për këto arsye kërkoj mbështetjen dhe votën tuaj që të jem unë ai që së bashku me ju do të përballemi me kandidatin e pozitës!
I drejtohem të gjithë atyre demokratëve që nuk e kanë braktisur kurrë partinë demokratike, atyre me të cilët kemi bërë betejë me qeverisjen aktuale që nga çadra, protestat e çdo perballje tjetër.
Te flasesh për veten është e vështirë, por unë ju garantoj që nëse më votëbesoni në këto primare do të jem një kandidat i fortë për të fituar Bashkinë Memaliaj .
Me konsideratë per te gjithë ju, Bukurosh Qani Ajdini !✌️✌️✌️🤚🤚🤚
