“Lumturisht” të shtirur përpara Kryeministrit të Shqipërisë..!!!
(Refleksion nga vizita e Kryeministrit në Tropojë)
Të ulur mbi duajt e barit të thatë, zyrtarë, socialistë, të punësuar dhe disa të zgjedhur me kokrra pritën të lumtur dhe me daulle Kryeministrin e Shqipërisë.
E quaj një gjë të mirë që kushdo e për më tepër Kryeministri të mirëpritet.
Tropoja e ka në gen bujarinë dhe mikpritjen.
Por besoj se Kryeministrit do t’i bëhej shumë më mirë t’i thuheshin shqip e hapur problemet e rënda me të cilat po haset Tropoja dhe po bën që me këtë trend pas dy vitesh të mos ketë asnje të ri në vendlindjen tonë.
-Kryeministrit, zyrtarët dhe ofiqarët duhet t’i tregonin se Tropojës sistematikisht po i ikin gjithë sherbimet bazike jo vetëm larg, në Kukës apo gjetkë, por po vendoset 4 herë trau e kontrolli doganor për të marrë një çertefikatë.
Aq shumë janë reduktuar shërbimet saqë nuk po gjejnë njerëz me shkollë për t’i bërë drejtorë, sepse i ka rrëmbyer arratia.
As Gjykatë, as Prokurori, as Përmbarim, as Paraburgim, as Hipotekë, as Kontroll automjetesh, as Zyrë për marrjen e lejeve të drejtimit të automjeteve…as..as..asgjë në botë.
Tropoja përveç historisë së vet që e veçon nga të gjithë kurdoherë edhe nën pushtime perendorish nuk ka qenë kaq e linçuar.
Ndërkohë harrojnë zyrtarët e rehatuar mbi kashtë që vendlindja jonë për nga siperfaqja zë vendin e dytë në Atdhe me 1059 km².
Harrojnë se Tropoja kufizohet me dy shtete të tjere me 84 km kufi.
Harrojnë se Tropoja kufizohet në vijë tokesore e ujore me 6 Bashki të tjera: Pukë, Has, Vau i Dejës, Shkodër, Fushë Arrës, Kukës.
Pra shumë mirë do ishte që këto shërbime të ishin në Tropojë nëse dikush do mendonte vërtetë për qytetarin, për njeriun!
Por askush e për më tepër rrogtaro-zyrtarët nuk e ngritën zërin përpara Kryeministrit duke u shtirë “të lumtur”.
Por kjo shtirje” lumturie” është me pasoja afatgjatë për brezat që vijnë.
