Ish-presidenti i SHBA-së, Donald Trump, sikurse pritej dhe VOA e njoftoi po dje, shpalli zyrtarisht rikandidimin e tij për rikthimin në Shtëpinë e Bardhë, duke thënë: “Rikthimi i Amerikës fillon pikërisht tani”.
Gjatë deklaratës për mediat në rezidencën e tij në Mar-a-Lago në Florida, Trump u shpreh: “Ne duhet të shpëtojmë vendin tonë”.
Kandidatura e Trump vjen pasi disa kolegë republikanë e fajësojnë atë për performancën e dobët të partisë në zgjedhjet afatmesme të javës së kaluar.
Presidenti Joe Biden, i cili mundi Trump dy vjet më parë, ka thënë se ai mund të kandidojë për tu rizgjedhur President më 2024.
Duke folur para mbështetësve të martën mbrëma, Trump, 76 vjeç, tha: “Ne jemi një komb në rënie”.
“Për miliona amerikanë, dy vitet e fundit nën Joe Biden kanë qenë një kohë dhimbjeje, vështirësie, ankthi dhe dëshpërimi.” Ai vazhdoi: “Për ta bërë Amerikën sërish të madhe dhe të lavdishme, sonte po shpall kandidaturën time për president të Shteteve të Bashkuara”.
Pak para fjalimit, Trump dorëzoi dokumentet në Komisionin Federal të Zgjedhjeve duke deklaruar zyrtarisht kandidaturën e tij për president dhe duke krijuar një llogari për mbledhjen e fondeve.
Ndërkohë, jashtë Mar-a-Lago, mbështetësit e tij u mblodhën për të valëvitur flamujt.
Fjalimi i zotit Trump zgjati për më shumë se një orë dhe preku shumë nga të njëjtat tema që ai ka përsëritur prej muajsh.
Ato përfshinin sigurinë kufitare, pavarësinë energjetike dhe krimin, si dhe sulmet ndaj të dhënave të zotit Biden në detyrë.
Bashkëshortja e tij, Melania Trump, iu bashkua në skenë në fund të fjalimit.
