Deputeti dhe njëkohësisht kreu i Partisë së Bashkimit për të Drejtat e Njeriut, Vangjel Dule, ka deklaruar në seancë plenare se reforma territoriale e vitit 2014 ka dështuar. Gjatë fjalës në Kuvend, Dule tha se vendi është shpopulluar për shkak të mungesës së shërbimeve si dhe mungesës së të ardhurave. Po ashtu ai i cilësoi 61 bashkitë si feude, që sipas tij ky është mentaliteti i tyre. Po ashtu Dule ka shtuar se reforma territoriale do të nisë sërish, për shkak se do të kërkohet nga Brukseli.
“Reforma ka dështuar në përfaqësimin e qytetarëve. Vendi është shpopulluar. Mund të ketë bashku me 400 mijë banorë dhe të ketë shërbim cilësor. Mund të ketë bashki me shumë pak banorë dhe s’ka shërbim. Dëgjoni një rast. Që të marri shërbim banori i Leskovikut sot në Ersekë duket të udhëtojë me kilometra. Keni bërë 61 feude, kjo është mentaliteti juaj, ju nuk mund të funksiononi ndryshe. Le të tregohemi të sinqertë. Ne do ta fillojmë sërish territorialen, sepse do ta kërkojë Brukseli atëhere. Por pse nuk e nisim tani. Ne kemi bërë të pamundurën që zonat me resurse t’i shpopullojmë. Kjo është një lojë që mund të zgjasë për pak, por nuk mund të zgjasë përgjithmonë,” tha Dule.
