DHEMBJE
S’i shquaj lotët e mi,
Veç i ndjej
Si pikojnë
Së brendshmi
Në shpirt.
Ndjej si digjen
Pendesat,
Hidhërimi,
Fjalët pa kuptim
Dhe loti jetim…
Digjet gjithçka
Brenda shpirtit tim,
Ndërsa hiri
Ditën ma nxin
Dhe ec kuturu
Në harrim…
***
Endërra m’u tret
Të kam kaluar në mendje sot,
Disa herë…
Të shikoja me vështrimin kah dielli,
Pastaj të shikoja prapë,
E prapë…
Sytë,
Buzët qershi,
Duart,
Flokët dredharakë…
Ndërsa fjalët belbëzonin
Emrin tënd…
Të kam kaluar në mendje sot…
Dhe s’di pse në zemër
Ndjeva një shtrëngatë…
Bashkë me imazhin tënd
Ëndrra m’u tret nëpër natë…
PSHERËTIMË DALLGËSH
E ndjej psherëtimën e dallgëve deri këtu;
Dhembja më dhemb që s’jam pranë teje.
Dridhen muret e zyrës; edhe tryeza, gjithashtu.
Tërbohem e grindem me veten gjer në deje.
E ndjej psherëtimën e dallgëve deri këtu
Dhe siluetën tënde e shoh nëpër valë.
Stërgjatet dita. Ah sa vonon mbrëmja blu.
Që imazhin tënd të më sjellë pranë…
