Rexhep Shahu/Ka grua madhështore që i lexon hapat e atij që do

Bota dhe njerëzit nuk janë përgjithësisht të gatshëm ta paguajnë çmimin e dashurisë. As nuk kane qenë ndonjëherë të gatshëm. Dashuria ka gjithmonë çmimin e saj dhe të rëndë.
Njerëzit duan t’i duash e të bësh për ta, por nuk janë gati të bëjnë të njëjtën gjë për ty.
Nuk janë gati të kenë durim të rrinë gjatë e gjatë e të presin pasi pritja duket se i plak, kur në fakt pritja i bën të bukur.
Nuk janë gati të rrinë zgjuar netëve dhe t’u mbushen sytë me gur malli…, nuk janë gati të sakrifikojnë pasi dashuria, çmim të saj, sakrificën ka.
Por sakrificë nuk bën gjithkush për dashurinë pasi velloja e mashtrimit mbulon shumë gjëra.
Është e vështirë të lexosh hapat e atij apo asaj që do që larg, të lexosh hapat, sytë, fytyrën, është e vështirë se koha ka filluar të mos ketë kohë…
Por ka grua madhështore që i lexon hapat dhe ritmin e frymëmarrjes se atij që do, ka gra fenomenale që dinë të kuptojnë gjithçka…
Siç ka burra që edhe në ëndërr kujdesen për këmbët e ftohta të asaj që i fal ëndrrën dhe i jep krahë fluturimi.
Ka burra që me mend pëshpëritur, si lutjen Zotit në sofër, emrin e asaj që nuk u shlyhet nga kujtesa, që pëshpërisin lutjen që ajo të jetë mirë, veç të jetë mirë me shëndet dhe të dëgjojë në ëndërr jehonën e të qeshurës së saj.