1. Dashuria
Në një zgjim yjesh
më ngelën në pupla resh sytë e tu
u veshën me jorgan vitesh
zjarri ishte blu.
2. Shtegtimi
Ku dhe si janë shpendët
udhëtime të largëta,
shpirtra të gjallë e të vdekur,
botë e përafërt,
a është Qielli një fjalë
apo vetëm një sy i largët?
3. Perceptimi
E këputa gjembin në trupin tënd
gishti ndjeu dhimbjen
e koha lëvizi shumë shpejt
kohëve të tjera
nuk e merr dot me mend
dhe trëndafili mbeti si ferra.
4. Përhumbja
Një kohë tjetër udhëton në mendjen time
pyet si një fantazmë
hapin e këpucës që më vrau fëmijërinë
nëse një ditë do të jetë e diel
e syri i hapur si një vrimë
gëlltit brenda një diell.
Në retinë pikturohet me fjalë e me zë:
…Kush nuk pret askënd,
nuk pyet asgjë.
5. Mesazhi
Klithi një zog!
Edhe fjalët më brutale
nuk do t’i godiste aq fort!…
Një foto e vonuar vjeshte,
një foto e nënës duke mbledhur gjethe.
… ezani nga ana e xhamisë më nxë,
nga ana e kishës dëgjohen këmbanat
Por unë… mbetem pa zë!…
Zogu bëzan për nanat.
