Ish kryetari i PD-së Lulëzim Basha, ka përkujtuar lëvizjen antikomuniste të Postribës.
Ai shkruan në rrjetet sociale një përkushtim të posaçëm për këtë ngjarje..
Ja postimi:
8 shtatori i 1946-s shënon një nga ngjarjet më të rëndësishme të përballjes së shqiptarëve me instalimin e diktaturës komuniste.
Shtypja e Kryengritjes së Postribës në mënyrë të përgjakshme i tregoi shqiptarëve se përballja me regjimin komunist do të ishte e pamëshirshme dhe me pasoja të rënda. Vrasja dhe persekutimi i familjeve më të rëndësishme të kohës ishte tregues i qartë se përgjatë gjithë ekzistencës së tij gjakatare, komunizmi nuk do të kursente elitën e vendit.
Pushkatimi pa gjyq i 28 martirëve të Postribës dhe ekzekutimi më pas i dhjetra të tjerëve, persekutimi që përndoqi familjet e tyre për dekada, përbëjnë dëshmi rrëqethëse të sakrificave të pashembullta përballë instalimit të një diktature nga më të egrat në botë.
Në nderim të këtij kalvari sakrificash sublime është në dinjitetin tonë si komb që këtë ngjarje ta kujtojmë dhe respektojmë jo vetëm çdo 9 shtator. Eposi i Postribës dhe martirëve të saj meriton një vend nderi në historinë e Shqipërisë. Vetëm si e tillë, ne dhe dhe brezat më pas do të mund të respektojmë të shkuarën tonë për të ndërtuar një të ardhme të qëndrueshme. Ku e shkuara dhe të vërteta e saj të jenë baza për të ndërtuar një shoqëri të bazuar tek vlerat dhe nderimi për të kaluarën.
Lavdi përjetë heronjve të Postribës!
