Kështu shkruan Kryetarja e Kuvendit Lindita Nikolla për shenjtërimin e Nënë Terezës.
Ja postimi i plotë:
Sot, 6-vjetori i shenjtërimit të Nënë Terezës.
Ne, shqiptarët, kemi një arsye më shumë për ta kujtuar e për tu krenuar me këtë grua, nobeliste, Nënë dhe Shenjtore, një pasuri e vyer e kombit tonë. Rrallë ndodh, madje shumë rrallë, që një personalitet të jetësojë njëkohësisht shënjtërimin dhe shpalljen nobeliste të paqes.
Nënë Tereza do të vazhdojë përjetësisht t’u japë gëzim e ndriçim miliarda njerëzve. “Paqja fillon me një buzëqeshje”, na mëson Nënë Tereza. Dhe buzëqeshja e saj ka qenë e do të jetë burim besimi e shprese për njerëzit e besimtarët në mbarë globin.
Nënë Tereza ishte simboli i dhimbshurisë dhe dashurisë njerëzore, avokatja e të varfërve, të dobtëve, të pambrojturve, emigrantëve e të shpërngulurve nga Atdheu a vatrat familjare.
Nënë Tereza ishte dhe do të jetë frymëzim i humanizmit, solidaritetit dhe përkushtimit ndaj njerëzve në nevojë. “Shërbimi dhe veprimet e dhembshura janë fryt i dashurisë.”
Nënë Tereza ishte një shërbëtore e angazhuar e paqes. Sot janë domethënëse fjalët e saj: “Paqja nuk vjen me pushkë e bomba, por me dashuri e dhembshuri!”
Ishte kënaqësi të përshëndesja në konferencën kushtuar Nënë Terezës, organizuar nga komuniteti shqiptar i Selanikut, në 3 shtator.
Është detyra dhe nderi ynë si shqiptarë që t’i bëjmë pjesë të kulturës sonë shpirtërore e kombëtare mësimet e saj. Të udhëhiqemi e ndriçohemi nga dashuria e toleranca dhe të mos na errësohen gjykimet nga mëritë dhe urrejtja.
