Kreu i PL-së Ilir Meta, ka reaguar sot në rrjetet sociale, për largimin e të rinjve.
Ai, duke ju referuar rastit të dy binjakëve me rezultate të shkëlqyera dhe fitues në Universitetin e Mjekësisë, shkruan se duhet të frenojmë ikjen e të rinjve nga vendi. Shqipëria ka diell për të gjithë.
Ja postimi:
Historia e vëllezërve binjakë, studentë të ekselencës, Mario dhe Xhulio Popa është sa mbresëlënëse, po aq dhe trishtuese. Fitues absolutë në degën e Mjekësisë në Universitetin e Tiranës, ata thonë se pas përfundimit të studimeve të ardhmen e tyre e mendojnë jashtë vendit.
Si vëllezërit Popa janë me mijëra të rinj në Shqipëri, që në mungesë të shpresës këtu, bëjnë përpjekje çdo ditë për t’u larguar.
Të frenojmë ikjen e të rinjve tanë më të talentuar duke ju krijuar kushte dhe mundësi më të mira për arsimim dhe punësim, që të shprehin potencialet e vërteta dhe të ndërtojnë të ardhmen e tyre në vend.
Shqipëria ka diell për të gjithë! ☀️🇦🇱
