Kështu shkruan në rrjetet sociale eksperti i njohur i ekonomisë dhe pedagogu Abaz Aliko Dr Shkencave, duke theksuar se paga dhe shpërblimet mbajnë gjallë interesin e të punësuarve në sipërmarrje.
Ja postimi i plotë:
Të nderuar sipërmarrës, ndani me punëmarrësit tuaj një pjesë të fitimeve të biznesit! Paga nuk është vetëm “çmimi i mallit fuqi-punëtore” të cilin e përcakton tregu, është shumë më tepër se kaq. Edhe sikur të ishte kështu, tregu i punës në Shqipëri është shumë larg së qeni efiçent, që të mund të përcaktonte një çmim të drejtë për “mallin fuqi-punëtore”. Paga dhe shpërblime të tjera mbajnë gjallë interesin e punëmarrësit në sipërmarrje, motorrin e vërtetë që shtyn përpara objektivat tuaj. A mund të jetë dikush i interesuar për mbarëvajtjen e biznesit të dikujt tjetër kur fiton vetëm 200 apo 300 euro në muaj? A jetohet me një shumë të tillë kaq modeste?
Pa diskutim që aftësia sipërmarrëse duhet shpërblyer në përpjestim të drejtë me riskun, sepse ajo bën bashkë punën, tokën dhe kapitalin, të cilët veç e veç nuk prodhojnë asgjë. Por në afat të gjatë, nuk mbijeton dot një biznes i padashur nga bartësit e tij.
Të mos harrojmë gjithashtu se para 30 vitesh ishim të gjithë të varfër, dhe shumë prej përfitimeve fillestare të bizneseve në Shqipëri erdhën nga ndarja e padrejtë e pasurisë së përbashkët.
Një sipërmarrës është një qytetar vizionar. I di vështirësitë tuaja. Nuk e kam fjalën për bizneset mikro apo familjare që mezi mbijetojnë. Por përfitimet e një shtese në fitime nga 100 mijë euro në 120 mijë, nuk e sjellin asnjëherë atë kënaqësi njerëzore dhe dobi për ekonominë që sjell ndarja e 10 mijë eurove shtesë për punëmarrësit tuaj, duke u rritur rrogat nga 300 në 400 euro përshembull. Shqiptari e ka pasur në gjak bujarinë dhe altruizmin, vlera të paçmuara njrëzore. Nuk bëhet fjalë që të arrijmë menjëherë Japoninë apo SHBA-në ku punëtorëve u jepen aksione falas për t’i bërë të interesuar, sepse atje akumulimi i kapitalit është shumë i madh, por le të vazhdohet me një gjest fisnik me vlera të larta humane dhe përfitime praktike.
Shqipëria po boshatiset, mos pyesni se çfarë bën qeveria (sepse ajo është autorja kryesore e boshatisjes) mendoni se edhe ju mund të bëni “një gjë të vogël, me dashuri të madhe” (Nënë Tereza) që ky vend të ngelet një vend shqipesh!
