Një qytetar nga Gjakova është arrestuar nga Policia, pasi akuzohet se ka ushtruar dhunë ndaj bashkëjetueses së tij shtatzënë.
Bëhet me dije se pas dhunës së ushtruar ndaj saj, shtetasja hungareze ka tentuar që të largohet për në shtetin e saj, por bashkëjetuesi e ka kthyer me forcë në banesë.
Por mesa duket kjo nuk i ka mjaftuar gjakovarit dhe e ka dhunuar sërish duke e goditur me rripin e pantallonave dhe më pas e ka mbyllur në dhomë.
“Prokuroria njofton se, më 26 gusht 2022 në Gjakovë, konkretisht në shtëpinë e tyre të përbashkët, i pandehuri A.B., i shkakton lëndime trupore të dëmtuarës, T. J. G. (shtetase hungareze) viktimë e ndjeshme, grua shtatzënë, me të cilën ishte duke bashkëjetuar. Për shkak të dhunës së ushtruar ndaj saj në vazhdimësi nga i pandehuri, e dëmtuara kishte dalë nga shtëpia dhe kishte tentuar që të ikë për tu kthyer në shtetin e saj në Hungari, ku të njëjtës i është vënë pas i pandehuri duke e kthyer dhunshëm në shtëpi, të cilën e mbyll në dhomë duke e goditur me rrip në pjesë të ndryshme të trupit, me ç’ rast të dëmtuarës i shkakton lëndime trupore, sipas raportit mjekësor te lëshuar nga reparti i emergjencës së Spitalit Rajonal “Isa Grezda” në Gjakovë”, thuhet në njoftimin e prokurorisë së Gjakovës.
Prokurori ka kërkuar ndaj të pandehurit masën e paraburgimit në afat prej 30 ditësh.
