Kryeministri Edi Rama ka përcjellë në “Facebook” ceremoninë dhe lajmin e dhënies së Statusit “Fëmijë në Përkujdesje të Republikës” për fëmijët e Major Klodian Tanushit dhe Dr. Leonard Kamberit, të dy të vdekur teksa kryenin detyrën.
Kujtojmë se Major Klodian Tanushi u vra në Letoni në vitin 2019, teksa ishte në shërbim me forca të NATO-s.
Ndërsa dr Leonard Kamberi ishte një nga mjekët që humbi jetën në vitin 2020 teksa punonte me të sëmurët me COVID-19.
Ja postimi i Kryeministrit:
🙏Me mirënjohjen për sakrificën sublime të heronjve që dhanë jetën në krye të detyrës, i akorduam sot bijëve të Major Klodian Tanushit dhe Dr. Leonard Kamberit, Statusin “Fëmijë në Përkujdesje të Republikës”, si shprehje e zotimit tonë për t’iu bërë krah fëmijëve të tyre, me pagesën deri në 150% të pagës së prindit dhe paketën e plotë të mbështetjes nga shteti, derisa të jenë të zotët e vetes🤝
*Pas dy fazave të para, ku Statusi i veçantë i është akorduar 15 fëmijëve, bij të heronjve që sakrifikuan jetën në krye të detyrës apo për të shpëtuar jetë të tjera, do të vijojë procesi i shqyrtimit të dosjeve nga komisioni i posaçëm për “Fëmijët në Përkujdesje të Republikës”
