Gledis Nano është larguar nga detyra.
Ky është lajmi që po qarkullon…
Drejtori i Përgjithshëm i Policisë së Shtetit, i emëruar me bujë vjeshtën e vitit të shkuar ka dhënë dorëheqjen nga detyra në kulmin e zhvillimeve kriminale në Shqipëri.
Pa mbushur një vit, Nano është larguar ndërsa ngjarja më e rëndë, ajo e zhdukjes së Ervis Martinajt nuk është zbardhur. Ngjarjet kriminale dhe situata ku ndodhet Policia e Shtetit janë arsyet kryesore të largimit të Nanos, bëjnë me dije burimet nga policia.
Bëhet e ditur se, Nano i ka dorëzuar dorëheqjen kryeministrit Edi Rama dhe zyrtarizimi i largimit nga detyra do të bëhet pasnesër (ditë e mërkurë) në mbledhjen e Këshillit të Ministrave ku do të jepet edhe emri i drejtorit të ri.
Lajmi i dorëheqjes së Nanos u publikua nga disa media, ndërsa zëdhënësi i shtypit, Genti Mullai deklaroi se, “Drejtori i Përgjithshëm është në detyrë, nuk ka dhënë dorëheqje”.
