Mendohet se të dy pilotët i zuri gjumi dhe humbën uljen e tyre gjatë një fluturimi nga Sudani në Etiopi të hënën.
Incidenti ndodhi në bordin e një avioni Boeing 737-800 të Ethiopian Airlines që ishte nisur nga Khartoum në Addis Ababa.
CNN shkruan se avioni po fluturonte në lartësi 11 mijë metra kur nuk arriti të zbriste në Aeroportin Ndërkombëtar të Addis Ababa Bole, destinacioni i tij i planifikuar, më 15 gusht.
Kontrollorët ajrorë nuk arrinin të kontaktonin me ekuipazhin e avionit, pavarësisht përpjekjeve të pandërprera.
Mbas kësaj autoritetet dhanë alarmin, kur panë që avioni kaloi aeroportin dhe vazhdoi fluturimin.
Avioni më pas filloi të zbriste, duke u ulur i sigurt rreth 25 minuta më vonë.
Në lidhje me incidentin reagoi dhe analisti i fluturimeve Alex Macheras.
Përmes një postimi në Twitter, Macheras tha se pilotët duhet të trajtohen për lodhjen, pasi kjo rrit rrezikun për gabime gjatë fluturimit duke rrezikuar dhe jetën e njerëzve.
Duket se pasagjerët, veç vonesës nuk kuptuan se çfarë ndodhi.
“Lodhja e pilotëve nuk është diçka e re dhe vazhdon të përbëjë një nga kërcënimet më të rëndësishme për sigurinë ajrore ndërkombëtarisht,” shkroi Macheras në Tëitter ditën e djeshme.
