Gati 80% e hasjanëve mbijetojnë me të ardhurat qe ju vijnë nga Mbretëria e Bashkuar.
Kështu pohoi në një intervistë televizive Liman Morina, kryetari i bashkisë së Hasit.
Ai tha se edhe të punësuarit po ikin, sepse pagat janë minimale dhe nuk plotësojnë dot as mbijetesën.
Në sheshin e qytetit të Hasit do të vendoset një monument i Mbretëreshës Elisabeth të Anglisë.
Një vendim i tillë po ndërmerret në shenjë respekti ndaj mbretëreshës së vendit ku çdo familje ka më shumë se dy emigrantë në Angli.
Kryetari i bashkisë së Hasit, Liman Morina tha në një intervistë për Euronews Albania se ky vendim u mor për të shprehur mirënjohjen ndaj Mbretërisë së Bashkuar që siç theksoi është i vetmi burim mbijetese për hasjanët.
Morina tha se aktualisht çdo familje hasjane ka 1 ose më shumë pjesëtarë të vet në këtë shtet.
“Mbi 80 për qind e hasjanëve mbijetojnë falë ndihmës që vjen nga Mbretëria e Bashkuar. Çdo familje ka një person në Angli. Aktualisht edhe të punësuarit duan të ikin, pasi rrogat janë minimale. Muajt e fundit ka një trend shumë të lartë largimesh”, u shpreh Morina
