Sali Berisha ka dalë sot në një konferencë shtypi, posaçërisht për megaaferën me portin e Durrësit, sikurse e përcaktoi ai.
Mbi megaaferen e vjedhjes prej shumëmiliardësh euro me portin e Durrësit.
Kryetari i Partisë Demokratike Sali Berisha deklaratë nga selia blu.
• DEKLARATA E PLOTË E KRYETARIT TË PARTISË DEMOKRATIKE, SALI BERISHA
Ligji i parë i çdo hajduti është se ai sa më shumë që ka vjedhur aq më shumë kërkon të vjedhë. Rasti më tipik, apo shembulli sot është Edi Rama. I cili pasi është kapur në flagrancë me vjedhjen e 420 milion euro për djegësat, gjithçka me firmën e tij, vrapon të vendosë harresë këtë vjedhje, me dy mega-afera të mëdha, që janë 10 fishi i kësaj shume; ajo e Butrintit dhe Portit të Durrësit.
Jam sot këtu për të denoncuar për të shumtën herë aferën mafioze, korruptive të Edi Ramës me portin më kryesor, shekullor dhe mijëvjeçar të Shqipërisë dhe shqiptarëve, Portin e Durrësit.
Kjo aferë vjen në dhunim flagrantë të të gjitha ligjeve të vendit. Edi Rama deklaron se i ka dhënë një kompanie territorin prej 1.5 milion metra katrorë të ndërtimit aty të Dubai City, të Dubait Emaar-Rama, ose Rama-Emaar.
Dhënia pa garë e 1.5 milion metër katrorë truall, kudo që të ndodhë kjo është një shkelje flagrante e ligjeve të vendit, dhe jo vetëm atyre, por edhe ligjeve ndërkombëtare, të cilëve Shqipëria është e detyruar t’i respektojë këto ligje.
Së dyti, kjo aferë ose kjo mega aferë, mega skandal është e tillë, askush nuk njeh, meqenëse kompania është off shore, dhe kjo është e ndaluar me ligjet e vendit, që kompani të tilla të marrin prona publike të shqiptarëve. Kjo bëhet sepse Edi Rama dhe bashkëvjedhësit e tij duan të fshehin fitimet e tyre përrallore nga kjo aferë në parajsat fiskale të mafies botërore.
Së treti, në këtë aferë Edi Rama u thotë shqiptarëve se Shqipëria fiton 300 milionë, në një kohë kur vetëm trualli në breg, në pozicionin më të avancuar të qytetit të Durrësit kushton jo më pak se 3 miliardë euro në çmimin aktual, jo më pak se 3 miliardë euro. Pra në qoftë se pronarët e trojeve në Shqipëri japin truallin për zhvillim ndërtuesve sipas zonave me një përqindje nga 20 deri në 50 për qind, në zonat më të mira kjo shkon nga 40- 50 për qind, Edi Rama u lë shqiptarëve vetëm 10 për qind të fitimit.
Kurse merr vetë me kompaninë Emaar, 90 për qind të fitimit të vlerës. Ky është një super skandal, tejkalon çdo lloj imagjinate.
Por a është vetëm kjo gjoba e shqiptarëve që u bën Edi Rama me këtë aferë?
Jo, kjo është pjesë e saj, por po kaq e tmerrshme dhe e rëndë është gjoba që Edi Rama u bën, duke i privuar ata nga porti i tyre shekullor. Përfitimet e tij marramendëse, ai ka shpallur se do të ndërtojë një port të ri, i cili shkon afërsisht 2 miliardë euro.
Pra, shqiptarët duhet të paguajnë nga paratë e taksave të tyre ndërtimin e një porti të ri prej 2 miliardë eurosh në Porto Romano në mënyrë që Edi Rama me kompanitë off shore të Emaar-it apo stër-Emaar-it të përvetësojnë 1.5 milionë metër katrorë territor porti dhe vetëkuptohet që 90 për qind të sipërfaqes së ndërtimit dhe mos më shumë.
Me këtë rast dua t’i them Edi Ramës, dua t’ju them aksionerëve të fshehtë të kësaj kompanie, dua t’ju them përfunduesve fundorë se ju që veproni kështu me një kryemafioz shqiptar jeni mafiozë dhe se kurrë nuk do të gëzoni pasurinë publike të shqiptarëve në Portin e Durrësit. Hiqni dorë nga kjo aferë super skandal.
Përveç këtyre, Porti i Durrësit është porti i një vendi anëtar i NATO-s dhe anëtar i Bashkimi Europian, është porti i një rëndësie strategjike, ndryshimi i destinacionit të të cilit nuk mund të bëhen pa një mbështetje, pa një miratim të NATO-s dhe Bashkimit Europian, por Edi Rama nuk njeh normë, nuk njeh kufij. Ai tani ëndërron veten multimiliarder dhe gjithçka bazuar në vjedhjen e pasurive publike të shqiptarëve.
