Moti i keq ka shkaktuar përmbytje në Itali. Mediat italiane raportojnë se situata në Monteforte Irpino, një qytet në periferi të Avellino, është kritike, ku shirat e rrëmbyeshëm që filluan dje pasdite përfshin disa zona të qytetit ndërsa uji ka pushtuar disa rrugë.
Automjete të shumta të parkuara janë përmbytur nga uji.
Kryebashkiaku Costantino Giordano iu ka bërë thirrje qytetarëve të mos dalin nga shtëpia. “Mos dilni nga shtëpia përveçse për arsye shumë urgjente”-shkroi ai në “Facebook”.
Ndërkohë ekipe të shumta të zjarrëfikësve të Avellinos janë duke punuar.
Në zonën historike, u evakuan disa persona të cilët ishin strehuar në katet e sipërme të shtëpive pas përmbytjes në katet e para.
Për momentin mediat shkruajnë se nuk raportohet për të lënduar, por numri i dëmeve parashikohet të jetë i konsiderueshëm.
Situata mbetet kritike veçanërisht në Piazza Aldo Moro, zonë e goditur rëndë dy vite më parë nga përmbytjet. Dhjetra zjarrfikës, duke përfshirë një ekip nga Foggia, ndodhen në terren për të monitoruar situatën dhe për të ofruar ndihmë për shoferët që ngecën në makina, pasi automjetet u zhytën në ujë.
Mario Bellizzi, komandanti provincial i Brigadës së Zjarrfikësve Avellino-s theksoi se për momentin nuk ka të lënduar.
