Sipas raportimit të Emergjencave Civile, gjatë 24 orëve të fundit në territorin shqiptar janë konstatuar 23 vatra zjarri. Shifër katastrofike dhe e frikshme për një shtet me sipërfaqe 28 mijë kilometra katrore.
Ajo që bie në sy është se mungon një mjet zjarrfikës ajror, aq i nevojshëm për konditat specifike të terrenit shqiptar.
Aryeja përse mungon një mjet i tillë nuk jepet.
Thjesht dëgjojmë ministrin Peleshi dhe Drejtorin e Emergjencave Civile duke na recituar fjalë boshe.
Me argumentimin e kostos së lartë të mjeteve ajrore.
Zjarrfikësit ndërkohë, me mjetet që disponojnë, të ndihmuar edhe prej ushtarëve e civilëve me kova e lopata, luftojnë heroikisht me flakët.
Por çështja është përse nuk kemi mjete ajrore zjarrfikëse?
Hyra në Google dhe kërkova për çmimet e mjetev zjarrfikëse ajrore.
Një aeroplan zjarrfikës modern i ri Canadair CL-415 kushton rreth 35 milion USD.
Nuk është çmim i pa përballueshëm për Shqipërinë.
35 milion Euro qeveria shqiptare mund t’i gjejë lehtësisht.
Mjaftojnë të mos bëhen dy kilometra autostradë.
Mjafton TVSH shtesë vetëm nga çmimi i naftës për 20 ditë.
Mjafton të mos bëhet pagesa e një kësti të kontratave të inceneratorëve tek persona të vdekur apo të azilit të pleqve.
Mjafton disa festa më pak në sheshin “Skënderbej”.
Dhe do ishte e mundur blerja e një avioni zjarrfikës modern.
Që kur bien zjarret të mos rrimë as me sy nga qielli, duke u lutur që të bjerë shi.
E as me sy nga Greqia se mbase vë dorën në zemër e na ndihmon.
