Sot kemi ndalur në qendër të Tiranës, fare pranë Komisariatit Nr 3, Rruga “Mine Peza” dhe Rruga e Bogdanëve.
Janë dy rrugë shumë të njohura këto jo vetëm se janë në qendër të kryeqytetit, por edhe për vendgjahun e policisë bashkiake që mbushin blloqet e gjobave në këtë zonë.
Shumë pallate, dendësi banorësh, autovetura familjare, zero mundësi parkimi.
Në brendësi të pallateve janë nja 10 vend parkime të mundshme, por ato janë uzurpuar me blloqe betoni e kufizuese hekuri nga ata që guxuan të parët të kapin hapësirat publike.
Banorët e tjerë shfryjnë nën zë e nuk flasin për mos të prishur qejf apo për të mos u konfliktuar me fqinjët e tyre.
Rregulluesi i këtyre anomalive është bashkia, por ata dalin nëpër lagje vetëm për të gjetur një shkak e për të lënë fletë gjobën 1000 deri 3000 lekëshe mbi xhamin e makinës.
Aksi i rrugës “Mine Peza” nga rrugë e brendshme lagjeje është kthyer në arterien kryesore që shkarkon trafikun e Tiranës për Durrës dhe qytetet e Veriut.
Mbetet segmenti i Rrugës së Bogdanëve, këtu ndodh uzurpimi shtetëror, disa vende rezervohen për policinë, disa të tjera për ambasadën e një vendi evropian, vendet e tjera janë me pagesë…
Po banorët ku e ndalin makinën për një hall, për një rast ?
Heshtja, do të thotë shkurt dhe qartë: Le të plasin kokën e të paguajnë gjobat !
Kjo është gjendja në qendër të Tiranës, teksa vëzhgoi këto betone zotëruese dhe këto tabela detyruese, ja po vijnë, i shoh, janë ata gjobëvënësit e shtetit.
