Kryeministri Edi Rama me Majlinda Dhukën, Ministre Shteti dhe Kryenegociatore, kanë bërë takim prezantues, por edhe objektivash me ekipin e negociatorëve të pregatitjes së dokumentacionit për BE-në.
Rama ka gjetur rastin të marri në “mbrojtje” Majlinda Dhukën, e cila ka një profil të ulët publik.
Dhuka zëvendësoi diplomatin Zef Mazin, që ishte një emër i shquar në diplomacinë shqiptare.
Sipas Ramës, ka shumë njerëz në administratë që as google nuk i gjen, por që kontribuojnë shumë për shtetin.
Kreu i qeverisë iu bëri me dije grupit të negociatorëve se tashmë i pret një sfidë e re dhe se në Bruksel duhet të flitet për këmbëngulje. Po ashtu ai u ndal dhe te emërimi i Dhukës në krye të këtij posti.
“Dua që në Bruksel Skuadra shqiptare të krijojë një përshtypje pozitive. Dua që në Bruksel të flitet për këmbënguljen dhe kapacitetet e punës së skuadrës shqiptare. Pjesën e madhe tuajën kam pasur mundësinë që t’i njoh. Sfida është komplet e re, Është me rëndësi që të theksoj këtu se vendosja e kryenegociatores së re nënvizon ndryshimin e natyrës së marrëdhënieve mes nesh dhe BE, përmes kryenegociatorit si urë. Mazi bëri një punë të lavdërueshme, diplomatike, duke qenë një krah i rëndësishëm në këtë proces, deri në momentin kur u vendos që negociatat të hapen formalisht. Më bëri përshtypje dikush kur doli emri i kryenegociatores, se ‘s’më doli në gogle’. Ka shumë njerëz në administratën tonë që s’i gjen në gogle por që pa ta nuk do të funksiononte administrata jonë. Janë pjesë e palcës së shtetit. ”, tha Rama.
