Xhevat Mustafa/Erion Veliaj, “bojaxhi”  i patronazhizmit në PS

Erion Veliaj, kryebashkiaku dhe drejtuesi politik i PS- së për Tiranën, me patetizëm pështirosës si dhe me demagogjinë e tij të dalë boje, “të shndërruar në art”, mbajti një ” fjalim historik” më 27 korrik. Pasi këputi një koqe fiku mufkë se ” ishte biri i askujt”, domethënë se ishte bir i partisë, mbrojti e reklamoi patronazhizmin, një nga “kryeveprat” apo “shtyllat” e Rama- parti- qeverisë!!!???
Ai pati edhe guximin dhe paturpësinë t’i vlerësonte patronazhistët si “kapilarët” që lidhin partinë e tyre me qytetarët, kur shumica e qytetarëve nuk ua kanë parë hajrin, edhe në ditë të vështira, kur kanë pasur shumë nevojë. Me aftësinë e tij “gjenetike partiake” për hipokrizi e mashtrim, duke  i pandehur shumicën e qytetarëve si syleshë e naivë, ai paraqiti spiunimin si shërbim të devotshëm në të mirë të qytetarëve, spiunët si shërbëtorë të popullit!!!???
Me këtë deklarim ai “harroi” faktin se shumica e  qytetarëve kanë frikë, alergji, përbuzje…ndaj patronazhistëve të Rama- Veliajt! Arësyet janë të shumta e dihen. Patronazhistët, ose ish sigurimsa “bio”, ose “mercenarë” të rekrutuar vitet e fundit prej Rama-parti qeverisë, janë burime informacionesh sekrete dhe intime për “blerjen” paraprake të votave e të “fitorjes” me premtime për punësim e privilegje të tjera, për rekrutimin apo majtizimin e qytetarëve të pavarur e më lehtësisht të përthyeshëm e të manipulueshëm. Edhe nga ky fjalim u rishpreh se aftësia për të mbuluar me gjethe fiku të keqen, lakuriqësinë mbi 80 vjeçare të partisë së tij të zemrës, vetveten, demagogjia dhe paturpësia e Veliajt mund të konkurojnë vetëm me ato të Edi Ramës!