Ky libër i gazetarit dhe studiuesit Qafoku Roland, është një nga botimet më të mira për historinë 100-vjeçare të marrëdhënieve diplomatike mes Shqipërisë dhe ShBA-ve, me fokus rolin e 22 misionarëve të saj diplomatik nga 10 Qershor 1922 e deri më sot (duke përjashtuar periudhën e regjimit komunist).
Numri 22 duket se e ka ndjekur gjithandej autorin e librit, por edhe historinë e marrëdhënieve tona me aleatin strategjik, i cili ka luajtur rol historik në zhvillimet e Shqipërisë. Në ’22 u vendosën marrëdhëniet mes dy shteteve dhe 22 është numri total i Ambasadorëve të ShBA-së në Tiranë dhe në 2022, bëhen 100 vjet histori diplomatike amerikane në Shqipëri.
Nga Ambasadori Maxwell Blake, që hodhi hapin e parë si diplomat amerikan në Tiranë e deri tek Ambasadorja Yuri Kim, që vijon kontributin e saj diplomatik për zgjerimin e partneritetit mes dy vendeve tona, ka një sagë ngjarjesh dhe zhvillimesh që do të duheshin dhjetra libra. Por, megjithatë, me punën e tij skrupuloze dhe sistematike, me stilin origjinal dhe gjuhën e pastër, me dokumentimin dhe seriozitetin e trajtimit të kujdesshëm të çdo detaji, Roland Qafoku ja ka arritur të sjellë para nesh një monografi historike shumë të dobishme. Ky libër do ju vlejë jo vetëm diplomatëve dhe atyre që merren me marrëdhëniet Shqipëri -ShBA, por një rrethi akoma më të gjerë historianësh, intelektualësh, gazetarësh, politikanësh etj.
“Ambasadorët Amerikanë në Shqipëri 1922 – 2022), i R. Qafokut, botim shumë cilësor i Shtëpisë Botuese “Onufri”, duhet të zërë vend në bibliotekat e të gjithë atyre që duan të njohin historinë e veçantë të marrëdhënieve shqiptaro-amerikane dhe duan të punojnë për forcimin e bashkëpunimit dhe miqësisë mes këtyre dy vendeve!
Duke e përgëzuar Landin për këtë botim, shpreh urimet e mia më të mira për këtë 100-vjetor, duke uruar që marrëdhëniet Shqipëri – USA të jenë 100 herë më të mira e më të forta🇦🇱🇺🇸
