Maxhoranca nuk guxon të dënojë e as të njohë genocidin serb në Kosovë!
Mbas një “odiseje” të gjatë, shkelje të rënda të rregullores së Kuvendit, “akrobacive” për të fshehur mungesën e vullnetit politik, Rama nëpërmjet mekanizmave parlamentare, nuk fut në rend të ditës Rezolutën tone edhe nesër në seancën e fundit të kësaj periudhe.
Bëhet fjalë për “Rezolutën për Njohjen e Dënimin e Genocidit Serb në Kosovë ” në vitet 98-99.
Kjo Rilindje për turpin e saj e të Kuvendit të Shqipërisë nuk guxon të pranojë një fakt të tillë historik, ashtu si veproi edhe me Rezolutën për Srebrenicëm, ku në asnjë resht nuk dënohet ai genocid dhe krimet i ngarkohen vetëm serbo-boshnjakëve, duke tentuar kështu të “shplajë ” Beogradin.
Çdo gjë po bëhet në përputhje me atë çfarë ka kërkuar Vucic pak kohë më parë nga parlamentet e “vendeve mike”, mos njohjen e genocideve serbe në Rajon.
“Shkopi” i tij qenka vendimtar për Rama&Co.
Ndërsa futja nga maxhoranca e një Rezolute kundër raportit te Dick Marty, një shpifje monstruoze ai raport, është thjesht një manovër për të maskuar mos njohjen e denimin e genocidit serb në Kosovë.
E gjithë ajo gënjeshtër e “organeve” është ngritur për të njollosur UÇK, luftën çlirimtare të Kosovës dhe për të hequr vëmendjen nga genocidi serb aty, për të zbehur ato krime millosheviciane, që detyruan NATO të ndërhyjë me forcë.
Pra së pari duhet njohur e dënuar genocidi serb, ashtu si dhe Qeveria shqiptare duhet të asistojë Qeverinë e Kosovës në paraqitjen e fakteve të atij genocidi pranë gjykatave e institucioneve ndërkombëtare, gjë që Prishtina nuk mund ta realizojë, se nuk është anëtare e OKB.
Kjo do t’i hapte rrugë çmontimit edhe të të gjitha gënjeshtrave të ngritura ndaj UÇK, siç është dhe ai raport.
Pikërisht këto kërkon dhe Rezoluta jonë, që kjo maxhorancë nën presionin e Vucic nuk guxon as ta paraqesë në seancë plenare, siç e do morali, e drejta, stabiliteti i Rajonit, dhe rregullorja e Kuvendit.
Një turp historik ky për të gjithë ne, që vërteton vasalitetin e plotë të Ramës ndaj Vucic.
