Duket se kriza politike në Malin e Zi po kapërcehet. Presidenti Milo Gjukanoviç dhe kryeministri Dritan Abazoviç janë ulur në një takim konsultues në Podgoricë duke evituar kështu rrëzimin e qeverisë. Ata rekomanduan që rasti për marrëveshjen me Kishën Ortodokse Serbe, të shqyrtohet prej ekspertëve ligjorë dhe shkencorë përpara miratimit dhe vendosjes së saj në zbatim.
“Bashkërisht u vlerësua se është në interes të Malit të Zi dhe të ardhmes europiane ruajtja e stabilitetit politik dhe përmirësimi i funksionalitetit të institucioneve të sistemit, në mënyrë që vendi kandidat për anëtarësim në BE, në një kohë sa më të shkurtër të përmbushë detyrimet që dalin nga agjenda europiane”, thuhet në një komunikatë të qeverisë së Malit të Zi.
