Ambasada amerikane në Kiev u ka bërë thirrje ditën e djeshme qytetarëve amerikanë që “të largohen menjëherë nga Ukraina. Lajmi u komunikua si një njoftim urgjent të publikuar pikërisht në faqen e internetit të ambasadës së Uashingtonit në kryeqytetin ukrainas. SHBA, u ka bërë thirrje edhe një herë qytetarëve amerikanë që të largohen menjëherë nga vendi pasi sulmet e vazhdueshme ruse e kanë bërë situatën e sigurisë të paparashikueshme.
Gjithashtu bëhet me dije se trupat ruse dhe separatiste të Republikës së vetëshpallur Popullore të Luganskut (LPR) pretenduan se kishin hyrë në qytetin e Siverskut, në rajonin juglindor të Donetskut të Ukrainës. “Qyteti është nën kontrollin tonë operacional dhe operacionet gjithëpërfshirëse janë duke u zhvilluar: Siversk së shpejti do të çlirohet plotësisht nga trupat ukrainase,” tha një burim i trupave të LPR, i cituar nga agjencia Tass, në atë që përfaqëson përparimin më të rëndësishëm ushtarak.
Ndërkohë , bombardimet ruse vazhduan ditën e djeshme në rajone të ndryshme përgjatë vijës që ndan forcat e Moskës dhe Kievit në lindje të vendit. Megjithëse bombat dhe raketat ruse po godasin pjesën më të madhe të Ukrainës, epiqendra e konfliktit vazhdon të jetë e vendosur në kuadratin lindor të vendit, ku objektivat e radhës të Moskës mund të përkojnë me qytetet Slovyansk dhe Kramatorsk. Gjithashtu në Donbass, ka sulme të shumta të dështuara tokësore ruse rreth Bakhmutit dhe afër Slovyanskut të lartpërmendur, si dhe sulme në veri të Kharkiv. Sipas inteligjencës britanike, pavarësisht nga sulmet e kryera me artileri në një front të gjerë, rusët “rrezikojnë të humbasin vrullin e grumbulluar pas marrjes së Lysychansk”.
