Hasan Salihamidzic qartëson pozitën e Bayern Munich në lidhje me bisedimet për mbrojtësin e Juventusit, Mathijs De Ligt. Pak ditë pas udhëtimit në Torino ku iu refuzua një ofertë prej 70 milionë eurosh në total, drejtori sportiv i kampionëve të Gjermanisë flet në një intervistë për gazetën “Bild” në lidhje me këtë çështje.
Ai u shpreh me nota optimiste për mbylljen me sukses të bisedimeve, bazuar në atë që e cilëson marrdhënie të shkëlqyer me klubin e familjes Agnelli për shkak të aventurës së tij në vitet 2007-2011 me fanellën bardhezi.
“Kam luajtur me Juven për 4 sezone dhe kam marrëdhënie të mira me klubin. Kemi diskutuar dhe duhet të jemi të duruar për të pritur se çfarë do të ndodhë. Ishte e rëndësishme të ulesha në një tavolinë me Arrivabenen, Cherubinin e Nedved”.
Një tjetër temë që drejtori e diskutoi me gazetarin e “Bild” ishte edhe merkatoja në frontet e tjera pavarësisht pengesave të çështjes Lewandowski.
“Do te jemi vigjilentë. Për momentin jemi në një pozicion të mirë. Jemi të kujdesshëm për të bërë lëvizjet e duhura në mënyrë që të forcojmë skuadrën tonë”.
