Një 39-vjeçar është arrestuar sot nga Policia e Tiranës, pasi akuzohet se ka ngacmuar seksualisht dhe goditur me grusht një qytetare në qendër të Tiranës.
Sipas njoftimit të policisë, ngjarja ka ndodhur në sheshin “Skënderbej”.
39-vjeçari S.M akuzohet për veprat penale “Ngacmimi seksual” dhe “Dëmtime të tjera me dashje”.
Ndërsa rezulton se 39-vjeçari ka qenë i dënuar më parë për vrasje.
Njoftimi
“Ngacmoi seksualisht dhe dhunoi një shtetase, kapet dhe vihet në pranga nga shërbimet e Komisariatit të Policisë Nr. 3., 39-vjeçari, i dënuar më parë për vrasje.
Shërbimet e Komisariatit të Policisë Nr. 3, pas marrjes së njoftimit se në sheshin “Skënderbej”, një shtetas kishte ngacmuar seksualisht një shtetase dhe e kishte goditur atë me grushte, menjëherë kanë organizuar punën për kapjen e tij.
Brenda pak minutave, nga shërbimet e Komisariatit të Policisë Nr. 3, është bërë kapja dhe arrestimi në flagrancë i shtetasit S. M., 39 vjeç, për veprat penale “Ngacmimi seksual” dhe “Dëmtime të tjera me dashje”.
Nga veprimet e mëtejshme hetimore ka rezultuar se ky shtetas, më datë 11.07.2022, në sheshin “Skënderbej”, ka goditur me grushte shtetasin A. D. dhe më pas i ka marrë me dhunë aparatin celular.
Materialet i kaluan Prokurorisë, për veprime të mëtejshme procedurale”
