Nga Greqia, shkruan, gazetari Shpëtim Zinxhiria
Zoti President!
Mjaft me dhënien e dekoratave, bëni diçka në mbrojtje të ish-dënuarve shqiptarë në Greqi.
Ju drejtohem juve si President i vendit tim dhe ju bëj thirrje që të veproni në mbrojtje të shqiptarëve, të cilët kanë mbaruar dënimet në burgjet e Greqisë, por kanë ngecur qëllimisht në ingranazhet burokratike të saj.
Sikur të mos mjaftojë kjo ka shtetas shqiptarë, që kanë mbaruar dënimin dhe mbahen ende në burg.
Vetëm në burgun e Patrës janë katër raste të tilla, për të cilat e kemi publikuar muaj më parë.
Nga informacioni që kam, ka ende shqiptarë, që kanë mbaruar dënimet dhe qëndrojnë padrejtësisht nëburg.
Ka edhe të tjerë, të cilët janë liruar me kusht dhe drejtësia greke kërkon t’i rikthejë përsëri me absurditetin më të madh.
Vetëm në burgun e Patrës, tre shqiptarë sot të liruar me kusht u ndeshën përballë drejtësisë me kërkesën e prokurorisë së rrethit.
Që të tre me anën e avokatëve të tyre kërkuan shtyrjen e seancës së gjyqit, duke mos rënë dakord me të tilla odise.
Afrim Rexha nga Kukësi është një ndërmjet tyre, i cili u mbajt 11 muaj më shumë nga afati i lirimit.
Sot prokuroria kërkon ta fusë prapë në burg edhe pse ai nuk ka asnjë penalitet. Këtë e ka konfirmuar me anën e një dokumenti edhe drejtoria e burgut në Patra, të cilën e kemi publikuar.
Tashmë këto raste po kthehen ne fenomen. Shqiptarët jo vetëm që dënohen pa avokatë dhe përkthyes, por mbahen në burg edhe kur mbarojnë dënimin e tyre.
Nëse të ka mbetur ndonjë dekoratë, jepja qeverisë shqiptare për indiferentizmin e saj dhe një vetes suaj, me të njëjtin motivacion gjithashtu.
