Presidenti i Sri Lankës, Gotabaya Rajapaksa është larguar nga vendi, pas protestave masive për krizën ekonomike që ka përfshirë vendin.
Rajapaksa u largua me një avion ushtarak, duke i dhënë fund një dinastie familjare që ka sunduar vendin për dekada. Ndërsa BBC shkruan se është e paqartë se ku ka shkuar ai.
Presidenti kishte qenë i fshehur pasi turmat hynë në banesën e tij të shtunën.
Vëllai i tij, ish-ministri i Financave Basil Rajapaksa, gjithashtu është larguar nga vendi, thanë burimet për BBC.
Vëllai më i vogël i Presidentit Gotabaya Rajapaksa u pengua të largohej nga vendi 24 orë më parë, por tani thuhet se po shkonte për në SHBA.
Banorët e Sri Lankës fajësojnë administratën e Presidentit Rajapaksa për krizën e tyre më të keqe ekonomike në dekada.
Për muaj të tërë ata kanë luftuar me ndërprerjet e përditshme të energjisë dhe mungesat e gjërave bazë si karburantet, ushqimet dhe ilaçet.
