Korporata Elektroenergjetike Shqiptare nënvizon se gjatë kësaj vere, plani i sigurimit të energjisë që do të furnizohet në vend, do të vijë në pjesën më të madhe të saj nga prodhimi.
Rezerva energjetike në kaskadën e Drinit është rritur gradualisht në mënyrë të ndjeshme, në raport me disa muaj më parë, kjo edhe për shkak të një plani të qartë ku është alternuar prodhimi me blerjet nga tregu i lirë.
Asetet termike gjeneruese, që janë marrë me qira nga KESH, pritet që të nisin prodhimin në shtator dhe së bashku kanë kapacitet prej 100 Mwh.
Si është menduar të përballohet stina e verës me furnizim energjie nga KESH? Cilat do të jenë alternativat për të plotësuar kërkesën në kuptimin e prodhimit nga kaskada, blerjes në tregun e lirë, prodhimi nga asetet termike të marra me qira, pesha që do të ketë secila?
Për periudhën e verës, qershor-korrik-gusht 2022, KESH sh.a. parashikon që të sigurojë furnizimin e plotë me energji elektrike të klientëve fundorë nga prodhimi vendas dhe importi.
Specifikisht, 55% do të sigurohet nga prodhimi vendas, 45% nga importi në tregun e parregulluar. Nga muaji shtator, parashikohet fillimi i gjenerimit edhe nga aseti termik notues, i përkohshëm, me kapacitet 100 Mwh.
Si paraqitet situata aktuale e kaskadës së Drinit sa u takon treguesve të saj lidhur me nivelet dhe rezervën energjetike?
Niveli në liqenin e Fierzës është 289.7 mmnd dhe rezerva energjetike është 1113 GWh.
A mund të kemi një përmbledhje të prodhimit nga kaskada, nga janari deri në fund të majit?
Në muajt janar-shkurt-mars 2022, kërkesa për energji elektrike nga FSHU sh.a. ishte e lartë dhe çmimet e energjisë në tregje ishin në vlerat më të larta të regjistruara. Për këtë arsye, KESH sh.a. gjatë kësaj periudhe ka bërë një optimizim të plotësimit të kërkesës nëpërmjet prodhimit dhe importit.
Në periudhën prill-maj 2022, për shkak të temperaturave të larta mbi mesataren tipike për këta muaj, e cila ndikoi në shkrirjen e dëborës së akumuluar gjatë dimrit, si dhe rasteve të izoluara me reshje shiu, solli rritje të prodhimit nga HEC-et private e koncesionar, ku një pjesë e mirë e energjisë shkoi për furnizimin e klientëve fundorë.
Si ka qenë ecuria e blerjeve në tregun e parregulluar nga janari në maj? Sasia e energjisë që është blerë dhe kostoja? Si ka qenë ecuria e çmime a ka një lloj stabilizimi apo mbeten të paqëndrueshme?
KESH sh.a. ka për detyrë plotësimin e kërkesës me energji elektrike të klientëve fundorë. Për realizimin e këtij qëllimi, KESH sh.a. mori masa për periudhën e mësipërme, që një pjesë të energjisë elektrike të sigurohej nga importi në tregun e parregulluar, konkretisht në shifrat e mëposhtme:
Ecuria e çmimeve nuk paraqitet e stabilizuar dhe mbetet e paqëndrueshme. Kemi rënie të lehtë të çmimeve të energjisë elektrike krahasuar me janar-shkurt-mars, e cila mund të ketë ardhur për arsye të kushteve meteorologjike në Europë (rritje të temperaturave e rrjedhimisht ulje të konsumit), gjë që ka sjellë ulje të kërkesë – ofertës dhe rrjedhimisht të çmimeve. Megjithatë çmimet e kësaj periudhe paraqiten në nivelin e rreth 5 herë më të larta se mesatarja e periudhës.
KESH ka marrë me qira dy anije për prodhim energjie. Në çfarë faze është ecuria e këtij projekti për punimet e nevojshme në Vlorë dhe kur pritet të nisë prodhimi i energjisë?
Kontrata me shoqëritë fituese të kërkesës për shprehje është nënshkruar dhe aktualisht për projektin, shoqëria KESH ka aplikuar për Leje Mjedisore dhe Leje Ndërtimi për fillimin e punimeve në zonën ku impianti i përkohshëm do të operojë.
Impiantet notuese janë në pritje të transportimit për në Shqipëri, parashikohet që me mbërritjen e tyre, fazat e komisionimit të realizohen në shtator, fazë gjatë së cilës do të fillojë edhe prodhimi i energjisë.
KESH-it i është ngarkuar detyra e sigurimit të furnizimit me energji në vend, në kuadër të emergjencës. Cilat janë disa nga sfidat me të cilat ju duhet të përballeni në këto kushte aspak të zakonshme, jo vetëm për Shqipërinë, por globalisht.
Një nga sfidat kryesore është përballimi i çmimeve të tregjeve të energjisë në kushtet gjeopolitike aktuale dhe të ardhshme, të cilat po ndikojnë edhe në çmimet e larta të energjisë.
Përballimi i gjendjes së emergjencës në furnizim, në kushtet e një viti hidrik të thatë.
Sfidë tjetër është rritja e kapacitetit prodhues vendas, në kushtet e emergjencës në furnizim, me qëllim plotësimin e kërkesës për furnizim me energji elektrike të klientëve fundorë nga prodhimi vendas, i cili do të jetë më ekonomik se energjia në tregje.
Rritja e kapaciteteve prodhuese, sjell së pari diversifikimin e burimeve prodhuese, prodhimi i të cilave përputhet me prodhimin dhe gjendjen hidrike, si impiantet fotovoltaike, dhe krijon pavarësi në prodhimin e energjisë apo ul ekspozimin për energji në tregje, si në rastin e marrjes me qira të aseteve prodhuese termike./Monitor
