Kryeministri i vendit e nis ditën e diel, duke uruar “mirmëngjes” gjithë nënshtetasit e tij të drobitur.
Si për t’a bërë më të gëzueshëm urimin qeveritar, ai i bashkangjit përshëndetjes edhe një imazh të mrekullueshëm nga plazhi i Velipojës.
Në praktikën e tij të propagandës, kreu i qeverisë, urim të tillë i nis elektoratit dhe kundërshtarëve çdo mëngjes.
Një ditë nga perla “Qafë Shtamë”, ditën tjetër nga Kolonja, nga Boga, nga Bylis, nga Progonati…
Por shqiptarët, mbeten vetëm duke ëndërruar vizita të tilla.
Vijmë te postimi i sotëm, te Velipoja e dashur.
Nga Tirana është afër vetëm 240 km vajtje dhe ardhje.
Kjo distancë kërkon minimalisht 25 litra naftë, barabartë me 6200 lekë. Kafe,shezlong, dhe çadër 1000 lekë.
Drekë për tre vetë në plazh, duhen 5000 lekë duke frenuar tundimin.
Llogari e shkurtër: një ditë kushton 12.200 lekë.
Paga e guximtarit është 60 mijë lekë.
Llogaritë të çojnë se nëpunësi, mësuesi, polici etj, e humbin trimërinë që te e diela e parë.
Por sigurisht që kreu i qeverisë nuk nxit ne për weekend të tillë, bëhet fjalë për 20% të popullsisë që munden për shëtitje të tilla.
Tirana, por jo vetëm, përpëlitet në hallet e saj, që të dielave ndihen më shumë.
Ndihen hallet të dielën më tepër, jo vetëm nga moslëvizja, por edhe nga blerjet që kryhen për konsum ushqimor.
Çmimeve të larta u janë shtuar ca kosto të tjera, të padukshme, por shumë të ndjeshme.
Një detaji banal në dukje… çmimi i qeskave të patates, domates, hudhrës etj, 20 lekë copa.
Puritanët e mjedisit na këshillojnë “torbat”, po dakord, por si? Qepë, vezë, hudhra, djath,rrush, qershi, fiq, luleshtrydhe, shalqi, bashkë të gjitha.
Zgjidhje jo e mjaftueshme…
Qeskat duhen paguar për të ndarë artikujt dhe kostot rriten gjithashtu.
Ëhhëë, po numëroni artikujt, as mos e mendoni, askush nuk e mbush “torbën” ashtu edhe pse aty janë më të domosdoshmet e ushqimeve.
E për t’i kthyer përshëndetjen, s’na mbetet veç t’a urojmë edhe ne:
Mirëmëngjes kryeministër !
